قىتايداعى اقجارقىن تۇرلىبايەۆاعا قاتىستى ۇكىم شىعارۋ مەرزىمى ءالى بەلگىسىز

بەيجىڭ- گۋانجوۋ. قازاقپارات - قىتايدا ەسىرتكى كونترابانداسى ءۇشىن ايىپتالىپ، تۇرمەدە وتىرعان قازاقستاندىق اقجارقىن تۇرلىبايەۆا ءىسى بويىنشا شەشىمدى جاريالاۋ مەرزىمى ءالى دە بەلگىسىز، دەپ حابارلايدى قىتايداعى «قازاقپارات» ح ا ا مەنشىكتى ءتىلشىسى.

17- مامىردا گۋانجوۋ قالاسىنىڭ 1№ تەرگەۋ يزولياتورىندا ق ح ر- داعى ق ر ەلشىلىگىنىڭ كونسۋلدىق ءبولىمىنىڭ قىزمەتكەرى اسىلبەك بۋتين قازاقستاندىق بويجەتكەنمەن كەزدەستى.

«اقجارقىن ءىسى بويىنشا سوت القاسى شەشىمىن جاريالاۋ مەرزىمى انىقتالعان جوق. كەزدەسۋدىڭ باستى ماقساتى ا. تۇرلىبايەۆانىڭ تاماقتانۋ، ەڭبەك پەن دەمالىس جاعدايىن ءبىلۋ بولدى. ونىڭ ايتۋىنشا، تاماق جاقسى، قىتاي تاعامىنا ۇيرەنىپ كەتكەن. ول كۇندىز قولعاپتاردى بۋىپ-تۇيۋمەن اينالىسىپ، بوس ۋاقىتىندا قىتاي يەروگليفىن ۇيرەنىپ، قىتاي تەلەديدارىنان جاڭالىقتار كورەدى ەكەن. اقجارقىن قىتاي ءتىلىن جەتىك مەڭگەرىپتى»، - دەدى ا. بۋتين «قازاقپاراتقا» بەرگەن سۇحباتىندا.

سونداي-اق ديپلومات ا. تۇرلىبايەۆانىڭ قىتايدىڭ قىلمىستىق كودەكسىن وقىپ، اباقتى كىتاپحاناسىنداعى اعىلشىن تىلىندەگى بارلىق كىتاپتارىن قايتا قاراپ شىققاندىعىن ايتتىپ بەردى.

كەزدەسۋدە اقجارقىندى قازاقستان تۋرالى جاڭالىقتار قىزىقتىرعان. «وعان تۋىستارىنىڭ ىستىق سالەمىن جەتكىزدىم، دەنساۋلىعىڭدى كۇت دەدىم. اقجارقىن ەكسپو جاڭالىقتارى، يليا يليننىڭ تاعدىرى تۋرالى سۇرادى»، - دەدى اسىلبەك بۋتين.