تالدىقورعانداعى «كوركەمسۋرەت گالەرەياسى» اۆتوكولىك جەڭىپ الدى - فوتو

تالدىقورعان. قازاقپارات - تالدىقورعانداعى كوركەمسۋرەت گالەرەياسى «ۇزدىك وبلىستىق مادەنيەت مەكەمەسى» اتاندى.

ۇجىمعا سۋ جاڭا «Lada Largus» ماركالى اۆتوكولىك تارتۋ ەتىلدى. جەتىسۋ تورىندە وتكەن مادەنيەت جانە ونەر قىزمەتكەرلەرىنىڭ كاسىبي مەرەكەسىندە وزگە دە 7 اتالىم بويىنشا ۇزدىك دەپ تانىلعاندار ارنايى ديپلومدار مەن 100 مىڭ تەڭگەنىڭ سەرتيفيكاتىن يەلەندى، دەپ حابارلايدى قازاقپارات ءتىلشىسى.

اتاپ ايتقاندا قاپشاعاي قالالىق كىتاپحاناسى، ب. ريموۆا اتىنداعى وبلىستىق دراما تەاترىنىڭ ءارتىسى ساندۋعاش مۇڭايتباسوۆا، قاراتال اۋدانىنداعى «التىناي» ءبي ءانسامبلى، تەكەلى قالالىق مادەنيەت ءۇيى جانە باسقا دا ۇجىمدار ۇزدىكتەر قاتارىنان كورىندى. ارنايى ديپلومدار مەن 100 مىڭ تەڭگەنىڭ سەرتيفيكاتىنا يە بولدى.

سونىمەن قاتار 18 ازامات «ۇزدىك مادەنيەت قىزمەتكەرى» اتانسا، ءبىرقاتار قىزمەتكەرلەر «مادەنيەت سالاسىنىڭ ۇزدىگى» توسبەلگىسىمەن، ءتۇرلى دارەجەدەگى قۇرمەت گراموتالارىمەن، العىس حاتتارمەن ماراپاتتالدى. جالپى وسى كۇنى 50 دەن استام مادەنيەت قىزمەتكەرى ماراپاتتالدى.

سالتاناتتى جيىندا ءسوز سويلەگەن وبلىس اكىمى اماندىق باتالوۆ كاسىبي مەرەكەمەن قۇتتىقتاپ، مادەنيەت سالاسىنىڭ قوعام ومىرىندەگى ماڭىزىنا توقتالىپ ءوتتى.

«مادەنيەت - ۇلتتىڭ قۋاتى، عاسىرلار بويى ۇزىلمەي كەلە جاتقان رۋحاني بولمىسى، اقىل-وي، پاراساتى. ەلباسىمىز نۇرسۇلتان ءابىش ۇلى: «مادەنيەت - ەلدىڭ ەڭ باستى رۋحاني بايلىعى، اسىل مۇراسى. قاي ەلدىڭ مادەنيەتى مىقتى دامىسا، سول ەلدىڭ ەڭسەسى دە بيىك بولادى»، - دەپ اتاي كەلە، «ەۋرازيانىڭ ەڭ ءبىر باي دا بىرەگەي مادەنيەتى - قازاق مادەنيەتى» دەگەن ەدى. حالىققا ساپالى مادەني قىزمەت كورسەتۋ ءۇشىن سالانىڭ ماتەريالدىق-تەحنيكالىق بازاسىن نىعايتۋ باستى نازارىمىزدا. مادەنيەت سالاسىن دامىتا وتىرىپ جانە سىزدەردەي زيالى قاۋىم، ونەر ادامدارىن قۇرمەتتەي وتىرىپ، ءبىز جاستاردى تاربيەلەيمىز»، - دەدى ا. باتالوۆ.

جالپى ءوڭىردىڭ مادەنيەت سالاسىنىڭ بيۋدجەتى 2015-16-جىلدارعا قاراعاندا 40 پايىزعا ءوسىپ، بيىلعى جىلى 7,6 ميلليارد تەڭگەگە جەتتى. مادەني نىسانداردىڭ كۇردەلى جوندەۋ جۇمىستارى مەن جوبالىق سمەتالىق قۇجاتتارىن جاساتۋعا بارلىعى 870,2 ميلليون تەڭگە ءبولىندى.