ساپاربايەۆ: سالافيزمگە زاڭدى تۇردە تىيىم سالۋ كەرەك

اقتوبە. قازاقپارات - اقتوبە وبلىسىنىڭ اكىمى بەردىبەك ساپاربايەۆ تەرروريزم جانە ءدىني ەكسترەميزممەن كۇرەس جولىندا ءبىرقاتار ۇسىنىس ايتتى، دەپ حابارلايدى قازاقپارات ءتىلشىسى.

اقتوبەدە پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتى كوشپەلى وتىرىس وتكىزگەن بولاتىن.

جيىن كەزىندە ءماجىلىس ءتوراعاسى نۇرلان نىعماتۋللين تەررورلىق ارەكەتتى جۇزەگە اسىرماق بولعان 220 دان استام ادامنىڭ جازالانعانىن ايتتى. قازىر اقتوبە وبلىسىندا جاعداي تۇراقتى. وتكەن جىلى باس پروكۋراتۋرانىڭ «حالىق قاۋىپسىزدىگى ءۇشىن» اتتى جۇمىسى بيىل جەرگىلىكتى جەردە جالعاسىپ، جات اعىمدى ناسيحاتتايتىن ءبىرقاتار سايتتار جابىلدى.

دەگەنمەن ماسەلە ءالى تولىققاندى شەشىمىن تاپقان جوق. «قۇقىق قورعاۋ ورگاندارى سالافيزم باعىتىن ۇستاناتىن 64 ادامدى ۇستادى. بۇل باعىتتاعى جۇمىس ءارى قاراي جالعاسادى. سونىمەن قاتار، سول قۇقىق قورعاۋ ورگاندارىمەن بىرلەسە وتىرىپ جات اعىم جەتەگىندە جۇرگەن ادامداردىڭ تولىق ءتىزىمى جاسالدى. قازىر ولاردىڭ سانى - 2255. وتكەن جىلى 2450 ادام بولعان ەدى. سوڭعى 7 ايدا دەسترۋكتيۆتى ءدىندى ۇستاناتىندار 197 ادامعا دەيىن قىسقاردى. بىزدە ءارقايسىسى تۋرالى اقپارات بار. ولاردىڭ نەمەن اينالىساتىنى، قايدا جۇمىس ىستەيتىنى، كىمدەرمەن ارالاساتىنى، وتباسى تۋرالى تولىق مالىمەت جيناقتالعان، جەكە جۇمىس ءجۇرىپ جاتىر. اسىرەسە، اۋىلدا. اكىمنەن باستاپ، ۋچاسكەلىك ينسپەكتور، ارداگەرلەر، قوعامدىق ۇيىم وكىلدەرى ءتۇسىندىرۋ جۇمىستارىن جالعاستىرىپ كەلەدى»، - دەدى وبلىس اكىمى بەردىبەك ساپاربايەۆ.

قازىر اقتوبەدەگى قارۋ-جاراق دۇكەندەرىنىڭ بارىندە دابىل تۇيمەسى جۇمىس ىستەپ تۇر. بارىنە بەينەكامەرا قوندىرىلىپ، قارۋ-جاراق ساقتاۋ قويماسىنىڭ قاۋىپسىزدىگى كۇشتەيتىلدى. دۇكەندەردەن تۇسەتىن دابىل الدىمەن وبلىستىق ىشكى ىستەر دەپارتامەنتىنىڭ ارنايى قىزمەتىنە، حالىققا قىزمەت كورسەتۋ ورتالىعىنا جەتەدى.

جيىن كەزىندە وبلىس اكىمى بەردىبەك ساپاربايەۆ تەرروريزم جانە ءدىني ەكسترەميزممەن كۇرەستىڭ بىرنەشە جولىن ۇسىندى. «الدىمەن سالافيزمگە زاڭدى تۇردە تىيىم سالۋ قاجەت. سونىمەن قاتار، ەلىمىز بويىنشا تىيىم سالىنعان ادەبيەتتەر ءتىزىمىن قايتا قاراپ، ولاردى جويۋ جۇمىستارىن جانداندىرعان دۇرىس. بىزگە ايەل تەولوگتار كەرەك. سەبەبى جات اعىم جەتەگىندە جۇرگەندەردىڭ 30 پايىزى ايەلدەر. بالالاردى ۆاكسيناتسيالاۋ دا ماڭىزدى. بۇل پروبلەما الداعى ۋاقىتتا ۋشىعىپ كەتۋى مۇمكىن.

قازىر وڭىردە 2500 دەن استام بالا ەكپە الماعان. ءبارى سول ءدىني كوزقاراستا جۇرگەن اتا-انالاردىڭ بالالارى. ءدىني جوعارى ءبىلىمدى شەتەلدە ەمەس، ەلىمىزدە العان دۇرىس. ءبىزدىڭ ويىمىزشا، جەرگىلىكتى جەردەگى جوعارى وقۋ ورىندارىندا تەولوگتار دايىنداۋ كەرەك. سەبەبى، قازىر تەولوگ مامان تاپشى. مەكتەپتەردە ءدىني كيىمدەر كيۋگە دە تىيىم سالعان ءجون»، - دەدى بەردىبەك ساپاربايەۆ.

اۆتور: التىناي ساعىندىقوۆا