الماتىدا ۇلى دالا ويىندارى ءوتىپ جاتىر
«سپورتتىق الماتى» باعدارلاماسى اياسىندا ۇيىمداستىرىلعان ءدۇبىرلى دودادا 600 سپورتشى باعىن سىناۋدا.
اشىلۋ سالتاناتىندا قالا اكىمى باۋىرجان بايبەك قازاقستان پرەزيدەنتى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىندا مادەنيەت پەن جەكە ۇلتتىق كودتى ساقتاۋعا ۇلكەن نازار اۋدارعانىن ايتتى.
«مەملەكەت باسشىسى ەلىمىز تاۋەلسىزدىككە قول جەتكىزگەن كۇننەن باستاپ ءتول قۇندىلىقتارىمىزدى ناسيحاتتاۋ ارقىلى ۇلتتىق سانانى جاڭعىرتۋدى باسىم باعىت رەتىندە ايقىنداپ بەردى. سونىڭ ارقاسىندا حالقىمىز ۇمىت بولا باستاعان تىلىمەن، وزىندىك مادەنيەتىمەن، سالت-داستۇرىمەن قايتا قاۋىشتى. مەملەكەت تاراپىنان ۇلتتىق سپورت تۇرلەرىنە، ونىڭ ىشىندە كوكپار، الامان بايگە، اۋدارىسپاق، تەڭگە ءىلۋ، جامبى اتۋ، اسىق اتۋ، توعىزقۇمالاق، قازاق كۇرەسى سىندى ايشىقتى ءىس-شارالارعا جۇيەلى تۇردە قولداۋ كورسەتىلىپ كەلەدى. بيىلعى جىلدىڭ اياعىنا دەيىن الماتى يپپودرومىندا جۇلدەلىك قورى 80 ميلليون تەڭگەنى قۇرايتىن 89 بايگە وتەدى. ءبىزدىڭ قالادا قازاق كۇرەسىنەن «الماتى بارىسى» مەن «الەم بارىسى» سايىستارىنىڭ ءوتۋى دە سپورت اۋەسقويلارى ءۇشىن ەرەكشە سىي بولماق»، دەدى ب. بايبەك.
ءوز كەزەگىندە ق ر ۇلتتىق سپورت تۇرلەرى قاۋىمداستىعىنىڭ پرەزيدەنتى بەكبولات تىلەۋحان الماتىنىڭ ەلىمىزدىڭ ۇلتتىق سپورت تۇرلەرى بويىنشا سايىستار ءجيى وتەتىن ەلىمىزدىڭ سپورتتىق جانە رۋحاني ورتالىعىنا اينالعانىن اتاپ ءوتتى.
«ۇلتتىق سپورت اتا-بابالارىمىزدان قالعان ءارى بارشا الەمگە ماقتانىشپەن كورسەتە الاتىن ءبىزدىڭ اسىل مۇرامىز. سوڭعى جىلدارى ۇلتتىق سپورت تۇرلەرى تەك قازاقستاندا عانا ەمەس، ءتىپتى شەتەلدە دە قارقىندى دامىپ، ەلىمىزدىڭ ابىروي-بەدەلىن ارتتىرا تۇسۋدە. ونىڭ جارقىن مىسالى «ەكسپو-2017» اياسىندا كوكپاردان وتەتىن الەم چەمپيوناتى»، - دەدى ب. تىلەۋحان.
ايتا كەتۋ كەرەك، ءدۇبىرلى دودادا سپورتتىڭ 12 ءتۇرى بويىنشا سايىس ءوتىپ جاتىر. ونىڭ ىشىندە 4 شاقىرىمدىق تاي جارىس، 7 شاقىرىمدىق قۇنان بايگە، 13 شاقىرىمدىق توپ بايگە، جايداق بايگەلەر، 21 شاقىرىمدىق الامان بايگە، كوكپار، اۋدارىسپاق، تەڭگە ءىلۋ، توعىزقۇمالاق، اسىق اتۋ، جامبى اتۋ، قازاق كۇرەسى بار. بيىعى جۇلدە قورى 24 ميلليون تەڭگە. سونداي-اق فەستيۆال قوناقتارىنىڭ بۇركىتتەر مەن اڭشىلىق تازى يتتەردىڭ ساف ونەرىن، قولدان جاسالعان قولدانبالى بۇيىمداردىڭ كورمەسىن تاماشالاۋعا مۇمكىندىكتەرى بار.
