قازاقستان ەلشىسى جانار ايتجانوۆا ريم پاپاسىنا سەنىم گراموتاسىن تابىستادى
اڭگىمە بارىسىندا ج. ايتجانوۆا قازاقستان جانە ۆاتيكان مەملەكەتتەرى الەمدەگى دامۋ جانە تۇراقتىلىق بويىنشا ورتاق كۇش بىرىكتىرىپ كەلە جاتقاندىعىن اتاپ ءوتىپ، قازاقستاننىڭ ىشكى ساياسي باستامالارى جايلى باياندادى.
ءوز كەزەگىندە ريم پاپاسى فرانتسيسك ادامزات ومىرىندەگى وزەكتى ماسەلەلەرگە توقتالدى. ول بۇگىنگى كۇنگى ەكونوميكالىق جانە قارجىلىق جۇيە قازىرگى زامانعى قوعامنىڭ قاۋىپسىزدىگىنە تولىق جاۋاپ بەرمەيتىندىگىن ايتتى.
قاقتىعىستاردىڭ ورىن الۋىنا ءدىندى دۇرىس تۇسىندىرمەۋ جانە تەرىس پايدالانۋ، سونداي-اق جەكە ماقساتتارىن جۇزەگە اسىرۋ جولىندا اللانىڭ اتىن پايدالانۋ سىندى فاكتورلاردىڭ ىقپال ەتەتىندىگىن تىلگە تيەك ەتتى.
پونتيفيكتىڭ پىكىرىنشە، جوعارىدا اتالعان قاۋىپ-قاتەرلەرگە الەۋمەتتىك جاۋاپكەرشىلىگى بار ەكونوميكالىق جانە الەمدىك قارجىلىق جۇيەلەر، سونىمەن قاتار، ديالوگ پەن ديپلوماتيا، بەيبىتشىلىك جانە تۇراقتىلىق - نەگىزگى تويتارىس بەرۋ قۇرالدارى.
وسىعان وراي، قازاقستان ەلشىسى ق ر پرەزيدەنتى نۇرسۇلتان نازاربايەۆتىڭ 2018-جىلى استانا قالاسىندا وتكىزىلەتىن «ءدىني كوشباسشىلار قاۋىپسىز الەمدى قولدايدى» تاقىرىبىنداعى الەمدىك جانە ءداستۇرلى دىندەر كوشباسشىلارىنىڭ سەزىن وتكىزۋى جايلى باستاماسىن اتاپ ءوتتى.
كەزدەسۋ سوڭىندا پونتيفيك پرەزيدەنت ن. ءا. نازاربايەۆ پەن قازاقستان حالقىنا جىلى لەبىزدەرىن ءبىلدىرىپ، ديپلوماتتىڭ قىزمەتىنە ساتتىلىك تىلەدى.
