سىرتقى نارىقتا قازاقستاندىق مۇنايعا دەگەن سۇرانىس ازايدى
ەنەرگيا رەسۋرستارىنىڭ الەمدىك نارىقتاعى باعاسىنىڭ ءبىرشاما قالپىنا كەلۋى قازاقستاننىڭ مۇنايدى شەتەلدە ساتۋدان تۇسەتىن كىرىسىن ءبىرشاما ارتتىردى.
اعىمداعى جىلدىڭ ءبىرىنشى توقسانىندا شيكى مۇناي مەن شيكى مۇناي ونىمدەرىن ەكسپورتقا شىعارۋدان 6 ميلليارد دوللار ءتۇسىم الىندى. بۇل 2016-جىلدىڭ قاڭتار-ناۋرىزىندا كومىرسۋتەكتى ەكسپورتتاۋدان تۇسكەن جالپى سومادان 35 پايىزعا ارتىق.
بيىل Brent ماركالى مۇنايدىڭ 1 باررەلىنىڭ قۇنى العاشقى ءۇش اي بويى 50-80 دوللاردان 56,81 دوللارعا دەيىن اۋىتقىپ وتىردى. ال 2016-جىلدىڭ باسىندا مۇناي باعاسى سوڭعى 5 جىلداعى ەڭ تومەنگى دەڭگەيگە ءتۇسىپ، باررەلىنە 28,94 دوللاردى قۇراعان ەدى.
ءبىراق شەتەلدىك ساتىپ الۋشىلارعا قازاقستاندىق مۇنايدى جەتكىزۋ كولەمى قىسقارا تۇسۋدە. اعىمداعى جىلدىڭ 1- توقسانىندا قازاقستان 15,9 ميلليون توننا شيكى مۇناي ەكسپورتتادى. بۇل 2016-جىلعى كورسەتكىشتەن 2 پايىزعا كەم. 2017-جىلى قازاقستان مۇنايىن ەڭ كوپ ساتىپ الۋشىلاردىڭ قاتارىندا يتاليا مەملەكەتى بار.
مۇنايدان تۇسەتىن كىرىستىڭ شامامەن 34,8 پايىزىن ءدال وسى ەل قامتاماسىز ەتىپ وتىر. ءبىر جىلدىڭ ىشىندە يتالياندىق كاسىپورىندار قازاقستاننان ساتىپ العان شيكىزات كولەمى 545 ميلليون دوللارعا باعالانۋدا.
فرانسياعا دا مۇناي ەكسپورتتاۋدان تۇسەتىن ءتۇسىم دە ارتىپ 497 ميلليون دوللاردى قۇرادى. ال نيدەرلاندىعا 203 ميلليون دوللارعا مۇناي ساتىلدى. ءبىراق، قازاقستاندىق مۇنايدى جاپونياعا ەكسپورتتاۋدان تۇسەتىن ءتۇسىم بيىلعى جىلدىڭ ءۇش ايىندا 2016-جىلدىڭ قاڭتار-ناۋرىزىمەن سالىستىرعاندا 102,5 ميلليون، قىتايعا 91 ميلليون، يسپانياعا 79,5 ميلليون دوللارعا كەمىدى.
