تالدىقورعان قالاسىندا «دارابوز باتىر قابانباي» عىلىمي- پراكتيكالىق كونفەرەنسياسى ءوتتى
وعان عالىمدار، تاريحشىلار، قوعام قايراتكەرلەرى قاتىستى، دەپ حابارلايدى قازاقپارات ءتىلشىسى.
كونفەرەنسياعا قاتىسۋشىلار الدىمەن تالدىقورعانداعى قابانباي باتىر ەسكەركىشىنە گۇل شوقتارىن قويدى. مادەنيەت سارايىنىڭ فويەسىندە كىتاپ كورمەسى ۇيىمداستىرىلدى. جيىندى اشقان وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى اقان ءابدۋالي قابانباي باتىردىڭ مەرەيتويى ەلىمىزدىڭ تۇكپىر- تۇكپىرىندە ءوتىپ جاتقانىن، بۇگىنگى شارا سونىڭ زاڭدى جالعاسى ەكەنىن اتاپ ءوتتى.
الدىمەن بايانداما جاساعان ش. ۋاليحانوۆ اتىنداعى تاريح جانە ەتنولوگيا ينستيتۋتىنىڭ باس عىلىمي قىزمەتكەرى، تاريح عىلىمدارىنىڭ دوكتورى احمەت توقتىبايەۆ موڭعول جەرىنە ۇيىمداستىرىلعان ەكسپەديتسيا بارىسىندا سول جەرلەردەگى ءدۇربىت، زاقشىن تايپاسى ۇرپاقتارىنىڭ اراسىندا ساقتالعان قابانباي باتىر تۋرالى اڭىزدار مەن دەرەكتەر جايىنا كەڭىنەن توقتالدى. جاۋ سانالعان ويرات ەلىندە، سونىمەن قاتار دۇڭگەن، قاراقالپاق ەلى ىشىندە دە قابانباي باتىر تۋرالى زور ىقىلاسپەن ايتىلاتىن اڭگىمەلەر ءسوز ەتىلدى. ياعني، قابانباي باتىردىڭ داڭقى ەل اۋماعىنان شىعىپ، سىرتقا كەڭىنەن تارالعانىنا توقتالدى. الداعى ۋاقىتتا تاريحي ماقساتتاعى ەكسپەديتسيالاردى جالعاستىرۋ قاجەتتىگىن دە ايتتى.
سونىمەن قاتار ءى. جانسۇگىروۆ اتىنداعى ج م ۋ- دىڭ گۋمانيتارلىق فاكۋلتەتىنىڭ دەكانى، تاريح عىلىمدارىنىڭ كانديداتى امان تولەمىسوۆ ءوز بايانداماسىندا باتىردىڭ ءومىر دەرەكتەرىنە شولۋ جاساسا، م. اۋەزوۆ اتىنداعى ادەبيەت جانە ونەر ينستيتۋتىنىڭ ءبولىم مەڭگەرۋشىسى، فيلولوگيا عىلىمدارىنىڭ دوكتورى، پروفەسسور نۇرداۋلەت اقىش باتىردىڭ ادەبيەتتەگى وبرازىنا توقتالدى.
ءال- فارابي اتىنداعى قازاق ۇلتتىق ۋنيۆەرسيتەتىنىڭ پروفەسسورى، فيلولوگيا عىلىمدارىنىڭ دوكتورى كاكەن حامزين ءوز سوزىندە قابانبايدىڭ ارنايى اسكەري ديپلوماتياسىن ناسيحاتتايتىن مۋزەيىن قالىپتاستىرۋ، باتىر تۋرالى كوپ سەريالى فيلمنىڭ سسەناريىن ازىرلەۋ جانە باسقا دا ۇسىنىستاردى ايتتى. «قازاق ۇلتىنىڭ برەندى وسىنداي ۇلى تۇلعالارىمىز بولۋى كەرەك»، - دەپ تۇيىندەدى ءسوزىن ك. حامزين.
مۇنان سوڭ «قاراكەرەي قابانباي باتىر» قوعامدىق قورىنىڭ ءتوراعاسى كامال ءابدراحمان ءسوز سويلەپ، جيىندى وبلىس اكىمىنىڭ ورىنباسارى جاقسىلىق ومار قورىتىندىلادى.
«ەل تاۋەلسىزدىگى ءۇشىن، ازاتتىق ءۇشىن كۇرەسكەن باتىرلاردىڭ ەرلىگىن ناسيحاتتاۋ - ۇرپاق پارىزى. بۇگىنگى كونفەرەنتسيادا تاريحي زەردەلەۋ، عىلىمي دالەل، تەرەڭ ىزدەنىستەرگە كۋا بولدىق. قابانباي باتىردىڭ 325 جىلدىعىنا ارنالعان بۇل كونفەرەنسيانىڭ عىلىمعا قوسار ۇلەسى مول دەپ بىلەمىن. سونىمەن قاتار ءبىز جاس ۇرپاقتى ءبىلىمدى، وتانسۇيگىش رۋحتا تاربيەلەي وتىرىپ، تاۋەلسىزدىكتى باياندى ەتە الامىز. بۇل ورايدا بۇگىنگى ۇيىمداستىرىلىپ وتىرعان شارانىڭ تيگىزەر ىقپالى زور بولادى دەپ ەسەپتەيمىز»، - دەدى ج. ومار.
اۆتور: سامال قابىشيەۆا
