وڭتۇستىك قازاقستاندىق كاسىپكەرلەر پروكۋروردان اراشا سۇرادى

شىمكەنت. قازاقپارات - وڭتۇستىك قازاقستان وبلىسىندا جەر قويناۋىن پايدالانۋشى كاسىپكەرلەر ءۇشىن كەدەرگى كوپ.

مۇنداي شاعىمدارىن ايماقتىق كاسىپكەرلەر پالاتاسىنىڭ قوعامدىق قابىلداۋىندا بولعان بيزنەس وكىلدەرى وبلىستىڭ مامانداندىرىلعان تابيعات قورعاۋ پروكۋرورى دانيار ماعاۋينعا ايتا كەلدى، دەپ حابارلايدى قازاقپارات ح ا ا ءتىلشىسى.

كەزدەسۋدە پايدالى قازبالار وندىرۋمەن اينالىساتىن تۇركىستاندىق كاسىپكەر وبلىس اكىمدىگىمەن جاسالعان كەلىسىمشارت مەرزىمىنەن بۇرىن توقتاتىلعانىن جەتكىزدى. «بۇل زاڭعا قايشى. ويتكەنى، «جەر قويناۋىن پايدالانۋ تۋرالى» زاڭدا شارتتى مەرزىمىنەن بۇرىن توقتاتۋ قارالماعان. ال ءبىزدىڭ سالىق پەن گەولوگيالىق زەرتتەۋلەر جۇرگىزۋگە تولەيتىن جىلدىق تولەمدەر از سوما ەمەس، 2 ميلليون تەڭگەنى قۇرايدى. ونى تولەۋ بىزگە اۋىر سوعىپ وتىر. بۇل سومانى ازايتۋ جونىندە بىرنەشە جىلدان بەرى ارىزدانىپ كەلەمىز. ءبىراق ودان ناتيجە جوق»، - دەيدى كاسىپكەر.

وبلىستىق جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى مەن كاسىپكەر اراسىنداعى داۋ سوتقا دەيىن جەتكەن. مۇنداي جاعداي وزگە جەر قويناۋىن پايدالانۋشىلارمەن دە كەزدەسىپ وتىر. ونىڭ سەبەبىن كاسىپكەرلەر كەلىسىمشارتقا ساي قارىزداردىڭ تولەنۋ ۋاقىتىسىنان كەشىكتىرىپ العانىمەن تۇسىندىرەدى.

«بىزدە جاۋاپتى باسقارما مەن قازبا بايلىقتى پايدالانۋشىلارمەن قانداي دا ءبىر سحەما جاسالماعان. ماسەلەنى بىرگە وتىرىپ تالقىلاۋدىڭ ورنىنا ليتسەنزيالارىمىزدى الىپ قويماقشى. ونى الىپ قويسا، قۇجاتتى قايتا راسىمدەۋىمىز قيىن بولادى. ال، گەولوگيالىق زەرتتەۋ جۇرگىزۋ ءۇشىن قوماقتى قاراجات سۇرايدى، ونى قالتا كوتەرمەيدى. ويتكەنى جىلدىق تولەمدەردىڭ سوماسى باسقا وڭىرلەرگە قاراعاندا قىمبات»، - دەيدى كاسىپكەر جاھان تورەقۇلوۆ.

ايتا كەتەيىك، جەر قويناۋىن پايدالانۋشى كاسىپكەرلەر ەل بيۋدجەتىنە جىل سايىن تولەۋى ءتيىس سالىقتىڭ كولەمى 2 ميلليون تەڭگەنى قۇرايدى. بۇل سوما وزگە وڭىرلەرمەن سالىستىرعاندا تىم جوعارى بولۋىنا بايلانىستى، كاسىپكەرلەر ونى تومەندەتۋ بويىنشا ارەكەت ەتىپ كەلە جاتقانىنا بىرنەشە جىل بولدى. بۇل رەتتە تابيعاتتى قورعاۋ ورگاندارى بارلاۋ جانە ءوندىرۋ كەلىسىمشارتتارىن مەرزىمىنەن بۇرىن بۇزۋدا. بۇگىنگى كۇنى ليتسەنزيالارىنان قارىزدانىپ قالعان ەكى كومپانيا ايىرىلدى. بۇدان بولەك، كاسىپكەرلەر بيۋروكراتيزمگە شاعىمدانۋدا. ولار ليتسەنزيا الۋ ءۇشىن قاعازباستىلىققا كوپ ۋاقىت جۇمسايتىنىن ايتىپ وتىر. ال گەولوگيالىق بارلاۋ جۇمىستارىنا قوماقتى سالىق تولەۋگە تۋرا كەلەدى. بۇگىن وبلىستىق جەر قويناۋىن پايدالانۋ، قورشاعان ورتا جانە سۋ رەسۋرستارى باسقارماسى 175 كاسىپكەرمەن كەلىسىمشارتقا وتىردى. قۇجاتقا قول قويعاندار سالىقتى ا ق ش دوللارىمەن تولەۋگە كەلىسىمىن بەرگەن. ءبىراق دەۆالۆاتسيا سالدارىنان ونى تولەۋ وڭايعا سوعىپ وتىرعان جوق.

وسى ماسەلەگە وراي ەندى ەلىمىزدە جاڭا جوبا ەنگىزىلمەك. وعان سايكەس، قىركۇيەك ايىنان باستاپ الەۋمەتتىك- ەكونوميكالىق تولەمدەردى تەڭگەمەن تولەۋگە بولادى. جىل باسىنان بەرى وڭىردە زاڭسىز جەر قويناۋىن پايدالانۋدىڭ 22 دەرەگى تىركەلدى. سوندىقتان قازىر ەلىمىز بويىنشا وسىنداي كاسىپكەرلەرمەن كەزدەسۋلەر ءوتىپ جاتىر. زاڭعا وزگەرىس ەنگىزۋ بويىنشا ۇسىنىس- پىكىرلەر تىڭدالۋدا. بۇل ۇسىنىستار پارلامەنتكە جولدانباق. ماسەلەنى جان- جاقتى تىڭداعان پروكۋرورلار كاسىپكەرلەردەن جازباشا تۇردە ارىزدارىن قابىلداپ، قاراپ شىعۋعا ۋادە ەتتى. ال، ءوڭىردىڭ كاسىپكەرلەر پالاتاسىنىڭ ماماندارى ماسەلەگە بەي-جاي قاراپ وتىرماي، سوت شەشىمىن بۇزۋ تۋرالى ۇسىنىم بەرمەك.

اۆتور: اينۇر اقبايەۆا