سەمەيدە ءاليحان بوكەيحانوۆقا تۇڭعىش ەسكەرتكىش ورناتىلادى

استانا. قازاقپارات - قىركۇيەك ايىندا سەمەيدە ءاليحان بوكەيحانوۆقا ارنالعان تۇڭعىش ۇلكەن ەسكەرتكىش ورناتىلادى، دەپ حابارلايدى «قازاقپارات» ح ا ا ءتىلشىسى.

بۇل تۋرالى بۇگىن ق ر ۇلتتىق اكادەميالىق كىتاپحاناسىندا «ساكرالدى قازاقستان» عىلىمي-زەرتتەۋ ورتالىعىنىڭ باسشىسى، ساياساتتانۋ عىلىمدارىنىڭ دوكتورى بەرىك ءابدىعالي ءمالىم ەتتى.

«بيىل الاش قوزعالىسىنىڭ 100 جىلدىعىنا وراي، ەلىمىزدىڭ ءار وڭىرىندە ءتۇرلى شارالار، كونفەرەنسيالار ءجۇرىپ جاتىر.  قىزىلوردا وبلىسى مۇستافا شوقايعا ەسكەرتكىش قويدى. سەمەيدە بيىل ءاليحان بوكەيحانوۆقا قولادان ۇلكەن ەسكەرتكىش قويۋ جوسپارلانىپ وتىر. ەستۋىمشە، وبلىس اكىمدىگى قاراجات ءبولىپ، ەسكەركتىش قوياتىن ورىندى بەلگىلەپ جاتىر. بۇل ءاليحان بوكەيحانوۆقا ارنالعان قازاقستانداعى تۇڭعىش ۇلكەن ەسكەرتكىش بولماق»، - دەدى ب. ءابدىعالي.

ەسكە سالا كەتسەك، بۇگىن ق ر ۇلتتىق اكادەميالىق كىتاپحاناسىندا الاشوردا ۇكىمەتى مەن الاش اۆتونومياسىنىڭ 100 جىلدىعىنا وراي «ەل-شەجىرە» قوعامدىق قورى شىعارعان عالىم-جازۋشى تۇرسىن جۇرتبايدىڭ «دۆيجەنيە الاش» اتتى 3 تومدىق قۇجاتتار جيناعى مەن بولات ءمۇرسالىمنىڭ «الاشوردا» فوتوالبومىنىڭ تانىستىرىلىمى ءوتتى.

ب. ءمۇرسالىمنىڭ «الاشوردا» فوتوالبومىندا الاش ارىستارىنىڭ ءومىرى مەن قىزمەتى فوتودەرەكتەر ارقىلى كورسەتىلسە، ت. جۇرتبايدىڭ «دۆيجەنيە الاش» اتتى 3 تومدىق جيناعى ارحيۆتەگى قۇپيا قۇجاتتار مەن سوت ماتەريالدارى نەگىزىندە قۇراستىرىلعان.

اۆتور: ايجان سەرىكجان قىزى