الاش قوزعالىسىنىڭ فوتوشەجىرەسى جارىق كوردى

استانا. قازاقپارات - الاشوردا ۇكىمەتى مەن الاش اۆتونومياسىنىڭ 100 جىلدىعىنا وراي، ق ر ۇلتتىق اكادەميالىق كىتاپحاناسىندا بولات ءمۇرسالىمنىڭ «الاشوردا» فوتوالبومىنىڭ تۇساۋى كەسىلدى، دەپ حابارلايدى قازاقپارات ءتىلشىسى.

فوتوالبوم الاش قوزعالىسىنىڭ قالىپتاسۋ، ساياسي ساحناعا شىعۋ، الاش اۆتونومياسىن قۇرۋ، كەڭەس داۋىرىندەگى قۋعىن-سۇرگىن كەزەڭدەرىنىڭ سۋرەتتەرىن قامتيدى. وندا ءا. بوكەيحانوۆ، م. دۋلاتوۆ، ح. دوسمۇحامەدوۆ، م. تىنىشپايەۆ، م. شوقاي جانە وزگە دە ەل قايراتكەرلەرىنىڭ جاستىق شاقتارىندا تۇسكەن فوتولارىنان، ن ك ۆ د اباقتىسىندا تۇسىرىلگەن سوڭعى سۋرەتتەرىنە دەيىن جيناقتالعان.

مۇنداعى فوتوماتەريالدار تاقىرىپتىق-حرونولوگيالىق تۇرعىدا «اتقان تاڭ»، «ويان، قازاق!»، «الاش اۆتونومياسى»، «سوۆەتتىك تاعدىرلار»، «اباقتى جولى»، «تاعزىم» اتتى تاراۋلارعا بولىنگەن.

وسىلايشا، اۆتور الاش قوزعالىسىنىڭ ءجۇرىپ وتكەن جولىن سۋرەت تىلىمەن بايانداپ، ۇلت زيالىلارىنىڭ ومىرىنە كەزەڭ-كەزەڭىمەن شولۋ جاساۋعا تىرىسقان.

جيناقتى «سامۇرىق-قازىنا» ۇلتتىق ءال-اۋقات قورىنىڭ قارجىلىق قولداۋىمەن «ەل-شەجىرە» قايىرىمدىلىق قورى الاشوردا ۇكىمەتى مەن الاش اۆتونومياسىنىڭ 100 جىلدىعىنا وراي شىعارعان.






 اۆتور: ايجان سەرىكجان قىزى