قازاقستاندا ەڭبەككە قابىلەتتى حالىقتىڭ ۇشتەن ءبىرى جوعارى ءبىلىمدى

استانا. قازاقپارات - ق ر ءبىلىم جانە عىلىم ءمينيسترى ەرلان ساعاديەۆ ەلىمىزدەگى جانە كورشىلەس ەلدەردەگى جوعارى ءبىلىمدى ادامداردىڭ سانىن سالىستىردى، دەپ حابارلايدى قازاقپارات.

ونىڭ سوزىنە قاراعاندا، رەسەيدە جوعارى ءبىلىمى بار حالىقتىڭ ۇلەسى قازاقستاننىڭ بارشا تۇرعىندارىنا شاققانداعى كورسەتكىشتەن اسىپ وتىر.

«ياعني ولاردا جوعارى ءبىلىمدى ادامدار 18 ميلليونعا ارتىق. ال ءبىز ءبىرىڭعاي ەكونوميكالىق كەڭىستىكتەمىز. ءۇش كۇن بۇرىن ءبىز قىتايدا بولدىق. بۇل ەلدە 55 ميلليون مەكتەپ تۇلەكتەرى، 8 ميلليون جوعارى وقۋ ورىندارى تۇلەكتەرى بار جانە ولار وسى كورسەتكىشتى ءۇش ەسەگە ارتتىرماق. جالپى، بارلىق ەلدەردىڭ بۇگىنگى باعدارىنا توقتالاتىن بولساق، قازىرگى ۋاقىتتاعى ەكونوميكا ءۇشىن ەڭبەككە قابىلەتتى حالىقتىڭ 50 پايىزى جوعارى ءبىلىمدى بولۋى ءتيىس. بىزدە بۇگىندە سايكەسىنشە 34 پايىز دەڭگەيىندە. ەگەر دە ەسەپتەپ قاراساق، ءبىر ميلليون ادام جەتىسپەيدى»، - دەدى مينيستر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تانىستىرۋ بارىسىندا.

ونىڭ پايىمىنشا، ءبىرىڭعاي ەكونوميكالىق كەڭىستىكتە باسەكەلەسە وتىرىپ، قازاقستان جوعارى ءبىلىمدى ادامدارعا سەنىم ارتا الادى.

سونىمەن قاتار قىسقا مەرزىمدە تۇبەگەيلى باسقا ماماندىقتاردى قايتا مەڭگەرىپ شىعاتىنداي ادامدارعا جاعداي جاساۋ كەرەك. ساعاديەۆ ساراپشىلاردىڭ تۇجىرىمىنا سۇيەنە وتىرىپ، جوعارى ءبىلىمدى ادام تۇراقتى جۇمىس ورىندارىن قۇرۋعا قاۋقارلى ەكەندىگىن اتاپ ءوتتى.

زاڭ جوباسى «بەس ينستيتۋتسيونالدىق رەفورمانى ىسكە اسىرۋ جونىندەگى 100 ناقتى قادام - ۇلت جوسپارىنىڭ» 78 قادامىن جۇزەگە اسىرۋ ماقساتىندا ازىرلەنگەن.

وندا نازاربايەۆ ۋنيۆەرسيتەتىنىڭ تاجىريبەسىن ەسكەرە وتىرىپ، جوعارى وقۋ ورىندارىنىڭ اكادەميالىق جانە باسقارۋ دەربەستىگىن ساتىلاي كەڭەيتۋ ەكسەرىلگەن.