قىتاي ۇكىمەتى قازاقستان دۇنگەندەرىنە ەلەكتروندى وقۋلىقتار سىيلادى - فوتو
«بۇل وقۋلىقتاردى ق ح ر سىرتقى ىستەر مينيسترلىگى ازىرلەگەن. ول ورىس، اعىلشىن جانە قىتاي ءتىلى سىندى الەمنىڭ 8 ءتىلىن ۇيرەنۋگە ارنالعان. ەلەكتروندى قالامساپتى كەز كەلگەن سوزگە اپارساڭىز ول ءوزىڭىز تاڭداعان تىلگە اۆتوماتتى تۇردە اۋدارىپ بەرەدى»، - دەدى قازاقستانداعى دۇنگەندەر قاۋىمداستىعىنىڭ جەتەكشىسى حۋسەي داۋروۆ.
ونىڭ اتاپ وتۋىنشە، قازاقستانداعى دۇنگەندەر قاۋىمداستىعى بۇل جاڭا وقۋلىقتاردى ەڭ ءبىرىنشى بولىپ الىپ وتىر.
«دۇنگەندەر وزدەرىنىڭ انا ءتىلى قىتاي ءتىلىنىڭ كونە ديالەكتىسىن ساقتاپ قالعاندىعىن ايتادى. بۇگىندە دۇنگەندەر جيناقى تۇرىپ جاتقان ەلدى مەكەندەردەگى مەكتەپتەردە انا ءتىلىن وقىتۋ بويىنشا قوسىمشا فاكۋلتاتيۆتىك ساباقتار وتكىزىلەدى. ال ەندىگى ۋاقىتتا، جاڭا ەلەكتروندى وقۋلىقتىڭ ارقاسىندا ءبىزدىڭ بالالارىمىز قازىرگى زامانعى ادەبي قىتاي ءتىلىن تەز ارادا مەڭگەرىپ، قازاقستان مەن قىتاي اراسىنداعى ەكونوميكالىق جانە مادەني ىنتىماقتاستىقتا ماڭىزدى رولگە يە بولا تۇسەدى. ويتكەنى، قازىرگى ۋاقىتتا ەكىجاقتى ىنتىماقتاستىقتى دامىتۋداعى ەڭ نەگىزگى پروبلەمالاردىڭ ءبىرى قازاق، ورىس تىلدەرىمەن قاتار قىتاي تىلىن جەتىك مەڭگەرگەن كادرلاردىڭ جەتىسپەۋشىلىگى بولىپ وتىر»، - دەدى دۇنگەندەر قاۋىمداستىعىنىڭ جەتەكشىسى.
ايتا كەتەيىك، قىتايدىڭ گانسۋ جانە شەنسۋ دۇنگەندەرىنىڭ ءبىراز بولىگىنىڭ جەتىسۋعا قونىس اۋدارۋى 1864-1878-جىلدارى باتىس قىتايداعى دۇنگەن كوتەرىلىسىنە بايلانىستى بولدى. ىلە ايماعىنان 6 مىڭداي دۇنگەن قازاقستان جانە ورتا ازيا جەرىنە كوشىرىلدى
مارلان جيەمباي
