الماتىدا «ۇلى دالا ويىندارىنا» قاتىسۋشىلار سانى رەكوردتىق كورسەتكىشكە جەتتى
ايتا كەتەيىك، الماتىدا 13- مامىردان باستاپ ۇلتتىق سپورت تۇرلەرىنەن «ۇلى دالا ويىندارى» رەسپۋبليكالىق فەستيۆالى ءوتىپ جاتىر. فەستيۆال 19- مامىر كۇنى مارەسىنە جەتپەك.
«قازاقستاننىڭ تۇكپىر-تۇكپىرىنەن كەلگەن سپورتشىلار ون ەكى ۇلتتىق سپورت تۇرىنەن: تاي جارىس (4 ك م)، قۇنان بايگە (7 ك م)، توپ بايگە (13 ك م)، تەگىس بايگە، الامان بايگە (21 ك م)، كوكپار، اۋدارىسپاق، تەڭگە ءىلۋ، توعىزقۇمالاق، اسىق اتۋ، جامبى اتۋ جانە قازاق كۇرەسىنەن دوداعا ءتۇسىپ جاتىر.
فەستيۆال قالالىق يپپودرومدا سالتاناتتى تۇردە مارەسىنە جەتىپ، قورىتىندىلانادى. «سپورتتىق الماتى» باعدارلاماسى اياسىندا ءوتىپ جاتقان اتالعان رەسپۋبليكالىق فەستيۆال بيىل قاتىسۋشىلار جاعىنان رەكورد ورناتىپ وتىر. بارلىق سپورت تۇرىنەن 600 ادام ءوتىنىش بىلدىرگەن»، - دەدى الماتى قالاسى دەنە شىنىقتىرۋ جانە سپورت باسقارماسىنىڭ باسشىسى ءابىل دوڭبايەۆ.
سونىمەن قاتار، ۆەدومسۆو باسشىسى بيىل قازاقستان تاريحىندا تۇڭعىش رەت ات جارىسىنان «بايگە» رەسپۋبليكالىق چەمپيوناتى ءوتىپ جاتقانىن ايتتى.
«الماتى يپپودرومىنا وسىنشاما قاتىسۋشىنىڭ ءوتىنىش بىلدىرگەنىنە قۋانىشتىمىز. ءبىزدىڭ يپپودروم حالىقارالىق تالاپتارعا ساي كەلەتىنىن بىلەمىز. ءبىز قازىر ساپانى ارتتىرا تۇسۋگە جۇمىس جاساپ جاتىرمىز»، - دەگەن ءابىل دوڭبايەۆ «ۇلى دالا ويىندارىنىڭ» جۇلدە قورى 24 ميلليون تەڭگەگە جەتكەنىن ايتتى.
«جەكە كاسىپكەرلەر مەن ۇلتتىق سپورت تۇرلەرى فەدەراتسياسىنىڭ قولداۋىمەن جۇلدە قورى 24 ميلليون تەڭگەگە جەتىپ وتىر. بۇل ۇلتتىق سپورت ويىندارىنىڭ ابىرويىن اسىرىپ، قاتىسۋشىلاردىڭ قىزىعىن ارتتىرا تۇسەدى»، - دەدى ول.
