توقايەۆ بارشا مۇسىلمان قاۋىمىن كەلە جاتقان قاسيەتتى رامازان ايىمەن قۇتتىقتادى
«الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ وتىرىسىندا جۇزدەسكەنىمە قۋانىشتىمىن. سىزدەر ءاردايىم ءدىنارالىق تۇسىنىستىكتى نىعايتۋ جولىنداعى قازاقستاننىڭ يگى باستامالارىنا بەلسەندى تۇردە قولداۋ كورسەتىپ كەلەسىزدەر. الەمدىك جانە ءداستۇرلى دىندەر كوشباسشىلارى سەزى جۇمىسىنا قوسقان ايتۋلى ۇلەستەرىڭىز ءۇشىن زور ريزاشىلىعىمدى بىلدىرەمىن. بۇل ىنتىماقتاستىق ارى قاراي دا تابىستى جالعاسىن تابادى دەپ سەنەمىن. بارلىق قاتىسۋشىلاردىڭ اتىنان بارشا مۇسىلمان قاۋىمىن كەلە جاتقان قاسيەتتى رامازان ايىمەن شىن جۇرەكتەن قۇتتىقتاۋعا رۇقسات ەتىڭىزدەر»، دەدى وتىرىستى اشقان قاسىم- جومارت توقايەۆ.
ايتا كەتەرلىگى، وتىرىسقا ءال- ازحار جوعارعى يمامىنىڭ سىرتقى بايلانىستار جونىندەگى كەڭەسشىسى ءابدىلراحمان مۇسا، دۇنيەجۇزىلىك يسلام ليگاسى باس حاتشىسىنىڭ كەڭەسشىسى مۋنكيز اس- ساكار، ساۋدارابياسى كورولدىگى يسلام، ۆاكۋفتەر جانە ۇندەۋ ىستەرى جونىندەگى ءمينيسترىنىڭ كەڭەسشىسى ابدۋللا يبن فاحد ءال- لحيدان، يران يسلام رەسپۋبليكاسىنىڭ مادەنيەت جانە يسلامدىق بايلانىستار جونىندەگى ۇيىم پرەزيدەنتىنىڭ ورىنباسارى گاحرامان سولەيماني، يسلاماباد حالىقارالىق يسلام ۋنيۆەرسيتەتى يسلامدى زەرتتەۋ ينستيتۋتىنىڭ باس ديرەكتورى مۇحامماد زيا ۋل- حاك، «نۇر- مۇباراك» مىسىر يسلام ۋنيۆەرسيتەتىنىڭ رەكتورى گوۋدا باسيۋني، فرانتسيا مەتروپوليتى ەممانۋيل اداماكيس، ارميان اپوستول شىركەۋىنىڭ ۋكرايندىق ەپارحياسىنىڭ جەتەكشىسى مارگوس وگانەسيان، بەدفورد ەپيسكوپى ريچارد اتكينسون، سونداي- اق قازاقستانداعى ءدىنباسشىلارى مەن ءبىرقاتار مەملەكەتتىك ورگان وكىلدەرى قاتىسۋدا.
وتىرىس بارىسىندا الەمدىك جانە ءداستۇرلى دىندەر كوشباسشىلارىنىڭ كەزەكتى سەزىنە دايىندىق شارالارى پىسىقتالماق. اتاپ ايتقاندا، سەزدىڭ ناقتى ۋاقىتىن بەلگىلەۋ كوزدەلىپ وتىر. بۇعان دەيىن VI سەزدى 2018 -جىلى وتكىزۋ تۋرالى جوسپار بولعان. الايدا اتالعان شارانىڭ ناقتى مەرزىمى بەلگىلەنبەدى. سونداي- اق، بۇگىنگى وتىرىستا ءدىنارالىق ديالوگقا قوسقان ۇلەسى ءۇشىن «استانا» حالىقارالىق سىيلىعى مەن الەمدىك جانە ءداستۇرلى دىندەر كوشباسشىلارى سەزىنىڭ قۇرمەت مەدالىنە ۇسىنىلعان ۇمىتكەرلەر ماسەلەسى تالقىلاناتىن بولادى.
اۆتور: مارلان جيەمباي
