دەپۋتاتتار شەنەۋنىكتەردىڭ يمپورتتىق قىزمەتتىك كولىكتەرىنە نارازىلىق ءبىلدىردى
«پرەزيدەنت جولداۋىندا وتاندىق وندىرۋشىلەردى قولداۋدىڭ تەتىكتەرىن جەتىلدىرۋدى جانە ولاردىڭ مۇددەسىن قورعاۋ ءۇشىن بارلىق قاجەتتى شارالاردى قابىلداۋدى تاپسىرعان بولاتىن. سونىمەن قاتار 2015 -جىلدىڭ اقپانىندا ۇكىمەتتىڭ كەڭەيتىلگەن وتىرىسى باراسىندا مەملەكەت باسشىسى «قازاقستاندىق ءونىمدى ساتىپ ال» اكسياسىن ىسكە قوسۋدى ۇسىندى.
دەگەنمەن دە مەملەكەتتىك ورگانداردىڭ وكىلدەرى وسى ۇندەۋدىڭ باسىمدىقتارىن ەسكەرمەستەن، بۇرىنعىسىنشا شەتەلدىك كولىكتەردى ساتىپ الۋدى قالاپ وتىر. ۇستىمىزدەگى جىلدىڭ باسىنان بەرى مەملەكەتتىك ورگانداردىڭ شەنەۋنىكتەرى 400 دەن استام يمپورتتىق قىمبات اۆتوكولىكتەردى ساتىپ الدى، ونىڭ ىشىندە قىرىق اۆتوموبيل سوڭعى كەزدە شىعارىلعان
«Land Cruiser 200» مەن «Land Cruiser Prado»، سونداي- اق 100-دەن استامى «Toyota Camry» سەكىلدى مودەلدەر. قازاقستاندا قۇراستىرىلعان ماشينالار پايدالانۋ كەزىندە ايتارلىقتاي ءتيىمدى ەمەس دەگەن سىلتاۋلارى سەنۋگە كەلمەيدى. بىرىنشىدەن، وندىرۋشىلەرگە قاتىستى مەملەكەتتىك ورگانداردان رەسمي نارازىلىق تۋرالى اقپارات جوق. ەكىنشىدەن، مەملەكەت وتاندىق اۆتوونەركاسىپتى قولداۋعا قوماقتى قارجى بولۋدە، سوندىقتان دا وندىرۋشىلەردەن ءونىمنىڭ ساپاسىن تالاپ ەتۋگە قۇقىلى»، - دەپ اتاپ ءوتتى دەپۋتات كەڭەس عاراپ ۇلى ۇكىمەت باسشىسىنا جولدانعان ساۋالىندا.
وسى ورايدا ول مەملەكەتتىك ورگاندار وتاندىق تاۋارلاردى قولداۋدا قوعامعا ۇلگى بولۋى ءتيىس ەكەنىن ايتا كەلە، بۇل تۇرعىدا بۇگىندە شەنەۋنىكتەر بارلىعىن كەرىسىنشە جاساپ وتىرعانىن، ياعني حالىقتىڭ اقشاسىنا بىرىنەن- ءبىرى اسىپ تۇسۋگە ۇمتىلاتىنىن اتاپ ءوتتى.
ءسوز سوڭىندا ول پرەمەر- مينيستر باقىتجان ساعىنتايەۆتان «اق جول» دەپۋتاتتىق فراكسياسى اتىنان قىزمەتتىك اۆتوكولىكتى الۋ بويىنشا مەملەكەتتىك جانە كۆازي مەملەكەتتىك سەكتاردىڭ ساتىپ الۋلارىن جۇرگىزۋدىڭ نەگىزدىلىگىن قايتا قاراستىرۋ ماسەلەسىن سۇرادى. سونىمەن قاتار وتاندىق تاۋار وندىرۋشىلەردى قولداۋ تۇرعىسىندا مەملەكەت باسشىسىنىڭ تاپسىرماسىن ەلەمەي جۇرگەن مەم ورگانداردىڭ باسشىلارىن جاۋاپكەرشىلىككە تارتۋ ۇسىنىسى جاسالدى.
اۆتور: رۋسلان عابباسوۆ
