قازاقستاندا اليمەنت تولەمەيتىن ايەلدەر كوبەيىپ جاتىر

استانا. قازاقپارات - اليمەنت تولەمەيتىن ايەلدەردىڭ قاتارى ارتىپ بارادى.

استانادا وتكەن جىلى 37 ايەل بالاسىنا اقشا اۋدارۋدان باس تارتسا، بيىل ولاردىڭ سانى 50 گە جەتكەن.

قۇلاققا تۇرپىدەي تيەتىن اقپاراتتى استانا قالالىق ادىلەت دەپارتامەنتىنىڭ ماماندارى ايتتى. ولار قالالىق پروكۋراتۋرامەن بىرلەسىپ، «اليمەنتكە 30 قادام» پيلوتتىق جوباسىن قولعا العان.

بۇل ارقىلى بالاسىن باعۋدان بەزگەندەردى زاڭعا تارتپاق.

داۋرەنبەك باقداۋلەت ماماندارمەن بىرگە رەيدتىك شاراعا قاتىستى. بۇل تۋرالى «استانا» تەلەارناسى حابارلادى. تىلشىلەردىڭ مالىمەتىنشە، بورىشكەرلەر امالسىزدان اۆتوكولىگىن بەرۋگە ءماجبۇر. تۇراققا كۇنىنە كەمىندە 3-4 كولىك كەلىپ قوسىلادى ەكەن. استانادا قازىر 13 مىڭ بورىشكەر بولسا، ونىڭ 4 مىڭى اليمەنت تولەۋدەن قاشىپ ءجۇر.

ونىڭ 50 دەن استامى جۇرەگى قاتايىپ كەتكەن نازىك جاندىلار. بورىشكەرلەر بەرەشەگى 1 ميلليارد 687 ميلليون تەڭگەگە جۋىقتاپتى. قازىر 100 گە جۋىق ادام اكىمشىلىك جازاعا تارتىلعان. سونىمەن قاتار، اليمەنت تولەۋدەن بەزگەندەردىڭ الدىمەن بانك كارتالارى، جۇرگىزۋشى كۋالىكتەرى بۇعاتتالادى. مۇنان كەيىن مۇلىكتەرىنە دە تىيىم سالىنىپ، الىنۋى مۇمكىن.

بۇعان دا قارىزىن قايتارماسا، 2 جىلعا باس بوستاندىعىنان ايىرىپ، قىلمىستىق ءىس قوزعالادى. سوت ورىنداۋشىلارى بولسا، بۇل ايەل مە، ەركەك پە، بالاسىن اسىراۋدان بەزگەندەردىڭ بارشاسىنىڭ باسىنا تۋاتىن كۇن دەيدى. «قازىر بىزدە تەك ەر ادامدار اليمەنت تولەمەيدى دەپ ويلايدى. الايدا، بالالارىن وتباسىنا تاستاپ، وزدەرى باسقا وتباسىن قۇرىپ كەتىپ جاتقان ايەلدەر دە جەتكىلىكتى. كوپتەگەن بورىشكەرلەر قازىر رەسمي ەش جەردە جۇمىس ىستەمەيدى. ولاردىڭ اليمەنت كولەمى ورتا ا ە ك - تەن ەسەپتەلەدى»، - دەيدى استانا قالاسى ادىلەت دەپارتامەنتىنىڭ مەملەكەتتىك سوت ورىنداۋشىسى.