اقتوبەدە «كوك تۋدىڭ جەلبىرەگەنى» اتتى پاريوتتىق كونسەرت ءوتتى
رەسپۋبليكالىق جوبا اياسىندا ءانشى ەسكەندىر يبراگيموۆپەن قاتار اقتوبەلىكتەر ونەر كورسەتتى، دەپ حابارلايدى قازاقپارات ءتىلشىسى. ەلىمىزدىڭ بىرنەشە وبلىسىن ارالاپ ۇلگەرگەن «كوك تۋدىڭ جەلبىرەگەنى» اتتى جوبا اقتوبەلىكتەرگە اسەرلى كەش سىيلادى.
«بالداۋرەن» رەسپۋبليكالىق وقۋ- ساۋىقتىرۋ ورتالىعى مەن «نۇر وتان» پارتياسىنىڭ «جاس وتان» جاستار قاناتى بىرلەسىپ ەلباسىنىڭ «بولاشاققا باعدار: رۋحاني جاڭعىرۋ» اتتى ماقالاسىن ناسيحاتتاۋعا، مەملەكەت رامىزدەردىڭ 25 جىلدىق مەرەيتويىنا ارناپ جاڭا جوبانى قولعا الدى. «ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنان سوڭ جاستارمەن، «جاس وتان» جاستار قاناتىمەن بىرىگىپ، حالىققا جەتكىزۋ ءۇشىن جولعا شىقتىق. ءارى بيىل رامىزدەردىڭ 25 جىلدىق مەرەيتويى بولادى.
«كوك تۋدىڭ جەلبىرەگەنى» اتتى جوبا اياسىندا الدىمەن وڭتۇستىك ءوڭىرىن ارالاپ، اقتوبەگە كەلدىك. ونەر ول - يدەولوگيا. سوندىقتان جاستارعا جول كورسەتۋ ءبىزدىڭ مىندەتىمىز»، - دەدى ق ر «دارىن» مەملەكەتتىك سىيلىعىنىڭ يەگەرى، ءانشى، كومپوزيتور ەسكەندىر يبراگيم. ءانشى كونسەرت كەزىندە «كوك تۋدىڭ جەلبىرەگەنى»، «امانات»، «التىن تۇلپار»، «ماڭگىلىك ەل»، «باتىرلار ۇرانى»، «جەرىم مەنىڭ» اتتى اندەرىن شىرقادى.
جوبا اياسىندا جەتەسوۆتەر وتباسىلىق ۇلگىدەگى انسامبلى مەن №3 -مۋزىكالىق مەكتەپتىڭ وقۋشىلارى ونەر كورسەتتى. «جاڭا جوبا ەلباسى ماقالاسىن جۇزەگە اسىرۋعا ارنالعان ناقتى قادام بولىپ سانالادى. جاستار ۇلەس قوسىپ، اقتوبەلىكتەر قولداپ، ىسكە اسىرىپ جاتىر. ماڭگىلىك ەل، قازاقستاننىڭ بولاشاعى جاستاردىڭ قولىندا. جاستار ەل بولاشاعى»، - دەدى «نۇر وتان» پارتياسى وبلىستىق فيليالى ءتوراعاسىنىڭ ورىنباسارى نۇرحان اعنيازوۆ.
ايتا كەتەيىك، كونسەرت ەلىمىزدىڭ بارلىق ايماعىندا وتەدى. وعان قوعام جانە سپورت قايراتكەرلەرى، وبلىستىق ءماسليحات دەپۋتاتتارى، جاس پاتريوتتار اكادەمياسىنىڭ مۇشەلەرى، اتا- انا قامقورلىعىنسىز قالعان وقۋشىلار، جاس اقىندار مەن مەكتەپ وقۋشىلارى قاتىسادى.
اۆتور: التىناي ساعىندىقوۆا
