استاناعا گاز قۇبىرىن تارتۋ قۇنى بەلگىلى بولدى

استانا. قازاقپارات - ەلورداعا كوگىلدىر وتىن جەتكىزەتىن «سارىارقا» ماگيسترالدى گاز قۇبىرىنىڭ قۇنى بەلگىلى.

بۇل جايىندا بۇگىن «ارناساي» جاسىل تەحنولوگيالار ورتالىعىندا وتكەن ق ر ەنەرگەتيكا مينيسترلىگى قوعامدىق كەڭەسىنىڭ كوشپەلى وتىرىسىندا مينيستر قانات بوزىمبايەۆ ءمالىم ەتتى، دەپ حابارلايدى قازاقپارات.

«قاز ترانس گاز» كومپانياسى  قىزىلوردا وبلىسىنان جەزقازعان، قاراعاندى، ودان كەيىن استاناعا جەتكىزىلەتىن «سارىارقا» ماگيسترالدى گاز قۇبىرى قۇرىلىسىنىڭ جوباسىنا قاتىستى تەحنيكالىق-ەكونوميكالىق نەگىزدەمەنى ازىرلەدى.

جوبانىڭ ەكىنشى كەزەڭىندە 2300 شاقىرىمنان استام كوكشەتاۋ-پەتروپاۆل قۇبىرى توسەلۋى ءتيىس. جوبا قۇنى 236 ميلليارد تەڭگە. بۇل وتە اۋقىمدى سوما. بۇعان قوسا ەلىمىزدىڭ سولتۇستىگىنە شامامەن 3 ميلليارد تەكشە مەتر گاز جەتكىزۋ مۇمكىندىگى تۋىندايدى»، - دەدى ەلىمىزدىڭ ەنەرگەتيكا ءمينيسترى قانات بوزىمبايەۆ.

ونىڭ اتاپ وتۋىنشە، وسىدان ءبىر اي بۇرىن جوبانىڭ تەحنيكالىق-ەكونوميكالىق نەگىزدەمەسى «مەملەكەتتىك ساراپتاما» ر م ك تاراپىنان وڭ قورىتىندى العان.

جوبا گاز قۇبىرى بويىنداعى وڭىرلەردىڭ دامۋىنا وڭ سەرپىن بەرگەنىمەن، سوڭعى تۇتىنۋشىعا كوگىلدىر وتىننىڭ قۇنى بارىنشا قىمبات بولماق. سوندىقتان «قاز ترانس گاز» كومپانياسى ەلىمىزدە گازدىڭ باعاسىن ورتاشا دەڭگەيگە كەلتىرۋ ءۇشىن پوشتالىق ماركا ادىسىنە جۇگىنۋدى ۇسىنىپ وتىر.

«ءبىز بۇل جايىندا اسەت يسەكەشەۆپەن سويلەسەمىز. سودان كەيىن كەلەسى ايدا پرەمەر-ءمينيستردىڭ وتىرىسىندا باياندايتىن بولامىز»، - دەدى ول.

اۆتور: مارلان جيەمباي