تورەشىلەر جەڭىستى الۆارەسكە بەرىپ قويۋى ابدەن مۇمكىن - ستانگريت
سەبەبى ەكى بوكسشى دا مىقتى. الايدا گولوۆكينگە جەڭىسكە جەتۋ ءۇشىن ايقىن باسىمدىق قاجەت، دەپ حابارلايدى قازاقپارات ءتىلشىسى.
«بۇگىندە اتالعان جەكپە-جەكتىڭ نوكاۋتپەن اياقتالاتىنى جايىندا ءجيى ايتىلىپ ءجۇر. دەگەنمەن، نوكاۋت بولمايدى دەپ ويلايمىن. ول جەكپە-جەك 12 راۋندقا دەيىن سوزىلادى. ەكى بوكسشى ءۇشىن اۋىر راۋندتار بولادى. سەبەبى ەكەۋى دە جاقسى سوققى جاسايدى، سول سوققىنى جاقسى كوتەرە الادى دا. سوندىقتان جەكپە-جەك تولىق 12 راۋندپەن اياقتالادى دەپ سانايمىن. ارينە، بىرەۋدىڭ قاباعى جارىلسا، اڭگىمە باسقاشا ءوربيدى. الايدا تازا نوكاۋت بولمايدى. سوسىن بۇل جەردە تاعى ءبىر نارسەنى ەسكەرۋ كەرەك، بۇگىندە گولوۆكينمەن سالىستىرعاندا، الۆارەستىڭ اتاق-ابىرويى جوعارى، جانكۇيەرى دە كوپ. سوندىقتان تورەشىلەردىڭ قاي جاققا يىلەتىنى بەلگىسىز. مەنىڭشە، گولوۆكين مەن الۆارەستىڭ ۇپاي سانى شامالاس بولسا، تورەشىلەر جەڭىستى الۆارەسكە بەرىپ قويۋى ابدەن مۇمكىن. سول سەبەپتى گولوۆكينگە ءوز قارسىلاسىن جاي جەڭىپ قانا قويماي، ايقىن باسىمدىققا يە بولعانى ءجون»، - دەيدى ستانگريت.
ايتا كەتەيىك، بۇعان دەيىن ا ق ش- تىڭ سپورت ساراپشىلارى دا گەننادي گولوۆكينگە ايقىن باسىمدىقپەن جەڭۋ كەرەكتىگىن جەتكىزگەن. «ەگەر گولوۆكين الۆارەستى نوكاۋتپەن جەڭسە، وندا ول بوكستىڭ شىڭىنا كوتەرىلەدى. بالكىم، PPV (ound-for-pound) رەيتينگىسىندە ءبىرىنشى ورىنعا شىعار.
بۇل جەكپە-جەكتە نوكاۋت گولوۆكينگە ۇلكەن اتاق-داڭك اكەلەدى. سەبەبى وسى ۋاقىتقا دەيىن «سارىباس» مەكسيكالىق جۇلدىزدى ءالى ەشكىم نوكاۋتقا جىبەرگەن ەمەس. گولوۆكين تازا نوكاۋتپەن جەڭسە، بوكس الەمىندە ۇلكەن وزگەرىستەر بولادى. بۇدان بولەك، Golden Boy ءۇشىن «الۆارەستى ريەۆانشا شىعارايىق پا، جوق پا؟» دەگەن ۇلكەن ديللەما تۋىندايدى. سەبەبى ساۋل تاعى نوكاۋت السا، ونىڭ بۇكىل سپورتتىق مانسابى نوكاۋت العانداي بولادى. ول PPV جۇلدىزى اتاعىنان دا ايىرىلادى»، - دەپ جازدى Boxingnews24.com سايتىنىڭ جۋرناليسى دەن ەمبروۋز.
اۆتور: ارمان اسقاروۆ
