ەڭبەك ءمينيسترى قازاقستاندا زەينەتاقى مولشەرىن ارتتىرۋدىڭ ءمان- جايىن ءتۇسىندىردى

استانا. قازاقپارات - بۇگىن ءماجىلىستىڭ جالپى وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەلىمىزدە زەينەتاقى مولشەرىن ارتتىرۋدىڭ كەزەڭدەرىن ءتۇسىندىرىپ بەردى، دەپ حابارلايدى قازاقپارات.

«بىرىنشىدەن، ەلباسىنىڭ بيىلعى جولداۋىندا بەرگەن تاپسىرماسىنا سايكەس، 2017-2018 -جىلدارى بيۋدجەتتەن تولەنەتىن زەينەتاقى مولشەرى ءۇش كەزەڭدە ارتتىرىلادى. ءبىرىنشى كەزەڭدە، ياعني 2017 -جىلعى 1 - قاڭتاردان باستاپ ىنتىماقتى زەينەتاقى مولشەرى 9 پايىزعا، بازالىق زەينەتاقى 7 پايىزعا ارتتى. ال ەكىنشى كەزەڭدە بيىلعى شىلدەدەن باستاپ ىنتىماقتى زەينەتاقى كولەمى قوسىمشا 11 پايىزعا، بازالىق زەينەتاقى 13 پايىزعا كوبەيتىلگەلى وتىر. ناتيجەسىندە، 2017 -جىلدىڭ 1 - شىلدەسىنەن زەينەتاقى مولشەرلەرىن 2016 -جىلعى دەڭگەيمەن سالىستىرعاندا 20 پايىزعا ارتتىرۋ قامتاماسىز ەتىلەدى. وسى ورايدا ەڭ تومەنگى زەينەتاقى 45 711 تەڭگەگە دەيىن، ورتاشا زەينەتاقى  66676 تەڭگەگە دەيىن ارتتىرىلادى»، - دەدى مينيستر «قازاقستان رەسپۋبليكاسىنىڭ كەيبىر زاڭنامالىق اكتىلەرىنە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا بايانداما جاساۋ بارىسىندا.

ونىڭ سوزىنە قاراعاندا، بۇل رەتتە ەكى ميلليوننان استام زەينەتكەر قامتىلادى. سونداي- اق 2017 -جىلعى 1 - شىلدەدەن باستاپ جاسىنا بايلانىستى زەينەتاقى تاعايىنداۋ ءۇشىن ەسەپكە الىناتىن تابىستىڭ ەڭ جوعارى مولشەرى 41-دەن 46-ايلىق ەسەپتىك كورسەتكىشكە دەيىن ارتىرۋ كوزدەلگەن. بۇل ۇستىمىزدەگى جىلدىڭ ءبىرىنشى جارتىسىندا تاعايىندالعان زەينەتاقىلاردىڭ 11 پايىزعا ارتۋى ەسەبىمەن، وسى جىلدىڭ ەكىنشى جارتىسىندا تاعايىندالاتىن زەينەتاقى مولشەرلەرىنىڭ تەپە- تەڭدىگىن قامتاماسىز ەتۋ ءۇشىن قاراستىرىلىپ وتىر.

«زەينەتاقىنى ارتتىرۋدىڭ ءۇشىنشى كەزەڭى 2018 -جىلعى 1 - شىلدەدەن باستاپ جۇرگىزىلەتىن بولادى. بۇل بازالىق زەينەتاقىنى تاعايىنداۋ ادىستەمەسىنىڭ وزگەرۋىمەن بايلانىستى. بۇگىنگى تاڭدا بازالىق زەينەتاقى زەينەتكەرلىك جاسقا جەتكەن ادامدارعا بىردەي مولشەردە بەكىتىلەدى. جاڭا ادىستەمەگە سايكەس، بۇل زەينەتاقى جۇيەسىنە قاتىسۋ ەڭبەك وتىلىنە بايلانىستى بولعالى وتىر. وسى رەتتە 1998 -جىلعا دەيىنگى ەڭبەك ءوتىلى جانە 1998 -جىلدان كەيىنگى جيناقتاۋشى زەينەتاقى جۇيەسىنە اۋدارىلاتىن جيناقتار مەرزىمى ەسكەرىلەدى»، - دەپ ءتۇسىندىردى ت. دۇيسەنوۆا.

 جالپى وتىرىستاعى تالقىلاۋلاردان كەيىن پالاتا دەپۋتاتتارى زاڭ جوباسىن ماقۇلدادى.

 اۆتور: رۋسلان عابباسوۆ