استانادا «ءبارى دە ءان ايتادى» اتتى كاراوكە چەمپيوناتى وتەدى - فوتو

استانا. قازاقپارات - ەلوردادا كاراوكەدەن «ءبارى دە ءان ايتادى» اتتى اشىق چەمپيوناتى وتەدى. «جاستار» سارايىنىڭ باستاماسىمەن جانە ەلوردا اكىمدىگىنىڭ قولداۋىمەن وتكىزىلەتىن شارا ءۇشىنشى رەت ءوز تىڭدارماندارىن قۋانتپاق.

18 جاستان اسقان ازاماتتار مۋزىكالىق ءبىلىمىنىڭ بار- جوقتىعىنا قاراماستان باستى سىيلىق - استانا اكىمىنىڭ كۋبوگىنا تالاسا الادى. چەمپيوناتقا قاتىسۋ ءۇشىن كاستينگ 19 -مامىردا ساعات 17.00 دە «جاستار» سارايىندا وتەدى، كونكۋرسانتتار وزدەرىنىڭ سۇيىكتى ءبىر ءانىن ورىنداۋى ءتيىس.

ءبىرىنشى ىرىكتەۋدەن وتكەن ۆوكاليستەر كاسىپقوي انشىلەرمەن دايىندالادى، ولاردىڭ ترەنينگتەرى مەن شەبەرلىك سىنىپتارىنا قاتىسادى. بۇدان باسقا قاتىسۋشىلار وتاندىق جۇلدىزدارمەن كەزدەسەدى. سونىمەن قاتار، چەمپيوناتقا قاتىسۋشىلار ەكى ىرىكتەۋ تۋرىنان وتەدى، سودان كەيىن جارتىلاي فينال مەن فينالدا باق سىنايتىن بولادى.

«حالىق» كاراوكەسىنە قاتىسۋشىلار ءۇش توپقا بولىنەدى، ونىڭ ءارقايسىسى بويىنشا جەڭىمپاز انىقتالادى، اكىمنىڭ كۋبوگى ەڭ كوپ بالل جيناپ، توپ جارعان انشىگە تابىستالادى. استانا قالاسىنىڭ مادەنيەت، مۇراعاتتار جانە قۇجاتتاما باسقارماسىنىڭ مالىمەتى بويىنشا، چەمپيوناتتىڭ ءبىرىنشى جانە ەكىنشى ىرىكتەۋ تۋرلارى 10- جانە 24 -ماۋسىمدا، جارتىلاي فينال مەن فينال 5-6 -شىلدەدە وتەدى.



ەسكە سالايىق، كاراوكەدەن «ءبارى دە ءان ايتادى» چەمپيوناتى ەلوردادا ەكى جىل بۇرىن العاش رەت وتكەن بولاتىن.

ول كەزدە قاتىسۋعا 200 دەن اسا ءوتىنىم قابىلدانعان. چەمپيوناتتىڭ قورىتىندىسى بويىنشا نۇرلان توكەنوۆ، دەنيس ني جانە ميلانا سەرىكوۆا جەڭىمپاز اتاندى. جاس تالانتتى ورىنداۋشىعا استانا اكىمىنىڭ كۋبوگى تابىستالدى. وتكەن جىلى چەمپيوناتقا قاتىسۋشىلار قىزىل الاشامەن ءجۇرىپ ءوتىپ، ءوز اسەرلەرىمەن ءبولىستى.

اۆتور: ەربول جانات