كاسىپكەرلەرگە قاتىستى قاداعالاۋدىڭ ۇشتەن ەكى بولىگى قىسقارتىلادى - تيمۋر قۇلىبايەۆ
بۇل تۋرالى ب ق و- عا جۇمىس ساپارى كەزىندە وبلىستىق كاسىپكەرلەر پالاتاسى وڭىرلىك كەڭەسىنىڭ كەڭەيتىلگەن جيىنىنا قاتىسقان «اتامەكەن» ۇلتتىق كاسىپكەرلەر پالاتاسىنىڭ ءتورالقا ءتوراعاسى تيمۋر قۇلىبايەۆ ءمالىم ەتتى، دەپ حابارلايدى «قازاقپارات» ءتىلشىسى.
ونىڭ ايتۋىنشا، 28 مىڭ باقىلاۋ- قاداعالاۋ قىزمەتىنىڭ ۇشتەن ەكى بولىگى قىسقارتىلادى. تۇپتەپ كەلگەندە، كاسىپكەرلەرگە قويىلاتىن تالاپتاردى 60 پايىزعا دەيىن ازايتۋعا بولادى. بۇل، ءبىر جاعىنان، مەملەكەتتىك اپپارات جۇمىسىن جەڭىلدەتسە، ەكىنشى جاعىنان، كاسىپكەرلەرگە قولايلى جاعداي جاسالادى.
ەڭ باستىسى، جەرگىلىكتى اتقارۋشى ورگاندار كاسىپكەرلەرمەن قويان- قولتىق جۇمىس جاساپ، قولداي بىلۋلەرى كەرەك. بۇل رەتتە وبلىستىق كاسىپكەرلەر پالاتاسى، «اتامەكەننىڭ» اۋداندارداعى وكىلدىكتەرى اكىمدىكتەرمەن بىرگە ءوزارا ءتيىمدى جۇمىس اتقارا الادى. جيىندا وبلىستىق كاسىپكەرلەر پالاتاسىنىڭ ديرەكتورى نۇرلان قايىرشين، باتىس قازاقستان وبلىسىنىڭ اكىمى التاي كولگىنوۆ وتكەن جىل قورىتىندىلارىنا، سونداي-اق ەلباسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنا سايكەس كاسىپكەرلىكتى دامىتۋ باعىتىندا الدا تۇرعان ماقسات- مىندەتتەرگە توقتالدى. 
مەملەكەت باسشىسىنىڭ تاپسىرماسىنا سايكەس قولعا الىنعان باعدارلامالاردىڭ ناتيجەسىندە 2016 -جىلى وڭىردە كاسىپكەرلىكتى قولداۋعا 3,9 ملرد. تەڭگە بولىنسە، بيىل 5 ميلليارد تەڭگەگە جاقىنداپ، 1 ميلليارد تەڭگەگە كوبەيىپ وتىر. سونىڭ ىشىندە اۋىلداعى كاسىپكەرلىكتى دامىتۋ ايرىقشا نازاردا بولماق. وسىعان وراي بۇل ماقساتقا «اتامەكەن» ۇ ك پ 300 ميلليون تەڭگە بولسە، وبلىس تاراپىنان دا سونشاما قارجى قارالاتىن بولادى.
جيىنعا قاتىسقان كاسىپكەرلەر سالانىڭ دامۋىنا كەدەرگى كەلتىرىپ وتىرعان كەيبىر تۇيتكىلدى جايتتاردى دا ورتاعا سالىپ، ءوز ۇسىنىس- پىكىرلەرىن ءبىلدىردى. سونىڭ ىشىندە «بيزنەستىڭ جول كارتاسى - 2020» باعدارلاماسى بويىنشا وڭىرلىك ۇيلەستىرۋ كەڭەسى ارقىلى قولداۋ تاپقان جوبالاردىڭ دا قارجىلاندىرۋسىز قالىپ وتىرعانى ايتىلدى.
اۆتور: ەلجان ەرالى
