ايەلى تۇرمەدەگى قىلمىسكەرگە عاشىق بولعان ازامات قاسىموۆتان كومەك سۇرادى
سونداي جايتقا تاپ بولعان وتانداسىمىز ىشكى ىستەر ءمينيسترى قالمۇحانبەت قاسىموۆتان كومەك سۇرادى دەپ حابارلايدى ZNUR. KZ ءتىلشىسى.
جابىرلەنۋشى ءوزىنىڭ جانە وتباسىنىڭ قاۋىپسىزدىگىن ويلاپ مينيسترگە ينتەرنەت ارقىلى حات جازدى. ونىڭ ايتۋىنشا، قۇداي قوسقان جارى وتكەن جىلدىڭ قىركۇيەك ايىنان باستاپ تۇرمەدە وتىرعان سوتتالۋشىمەن تەلەفون، ينتەرنەت ارقىلى حابارلاسىپ، «جەلىلىك ماحاببات» قۇرعان.
ايەلىنىڭ وزگەگە كوڭىلى اۋعانىن، ونىڭ ىشىندە تۇرمەدەگى قىلمىسكەر ەكەنىنە كوزى جەتكەن ازامات وتباسىن ساقتاپ قالۋ ءۇشىن جان جارىنىڭ ويىنشىق ماحابباتقا الدانىپ، اداسپاۋىن ءوتىنىپ سۇراعان. الايدا، بىرنەشە كۇننەن سوڭ وتاعاسىنىڭ ۇيالى تەلەفونىنا سوتتالۋشىدان قورقىتۋ تاقىرىبىنداعى حاتتار كەلىپ تۇسە باستاپتى.
«مەنىڭ ۇيالى تەلەفونىما «كۇت! مەن سەنى جەردىڭ استىنان تاۋىپ الىپ، سازايىڭدى بەرەمىن. ءومىر سۇرۋىڭە قانشا قالعانىن ساناي بەر!» دەپ جازىپ، ادامنىڭ باسىن كەسىپ جاتقان د ا ي ش- تىڭ جەندەتتەرىنىڭ سۋرەتتەرىن جىبەردى. وسىعان بايلانىستى اتى-ءجونى اتالعان سوتتالۋشىنىڭ (سوتتالۋشىنىڭ اتى-ءجونى اكتتا تولىق كورسەتىلگەن. NUR. KZ پورتالى جاريالاماۋدى ءجون سانادى.) د ا ي ش تەررورلىق ۇيىمىمەن بايلانىسى بار ما جانە مەنىڭ جەكە باسىمنىڭ قاۋىپسىزدىگىنە قاتىستى شارا قولداۋىڭىزدى سۇرايمىن»، - دەيدى ارىزدانۋشى.
ءبىر قىزىعى، سوتتالۋشى ازامات بوستاندىقتاعى كەلىنشەككە ءتۇننىڭ ءبىر ۋاعىندا ينتەرنەت ارقىلى ءوزىنىڭ جەكە سۋرەتتەرىن جىبەرىپ، ءجيى تەلەفون شالىپ تۇرادى ەكەن.
ىشكى ىستەر مينسيترلىگىنىڭ قىزمەتكەرلەرى جابىرلەنۋشىنىڭ ارىزىن قاناعاتتاندىرىپ، سوتتالۋشىنىڭ زاڭنان تىس ءىس-ارەكەتىن تەكسەرۋ تۋرالى شەشىمنىڭ قارالىپ جاتقاندىعىن العا تارتتى.
