اتتى ەكسپەديتسيا كيەلى جەرلەردى ارالاۋدا - فوتو
وبلىستىق ءماسليحات حاتشىسى ورال سارتايەۆتىڭ باستاماسىمەن جانە «نۇر وتان» پارتياسى اۋداندىق فيليالىنىڭ قولداۋىمەن قۇرىلعان ەكسپەديتسيالىق توپتىڭ قۇرامىندا جەتى ادام بار.
ولار وڭىردەگى كيەلى جەرلەردى، تاريحي ەسكەركىشتەردى جانە تانىمال تۇلعالاردى تۋدىرعان ەلدى مەكەندەردى اتپەن ارالاپ، اۋىل جاستارىمەن كەزدەسۋدە.
«ماقساتىمىز - شالعاي اۋىلدارداعى جاستارمەن كەزدەسىپ، جاس ۇرپاقتى ەلىن-جەرىن سۇيۋگە ۇگىتتەۋ، ولاردى ات سپورتىنا جانە ۇلتتىق ونەرگە باۋلۋ. الدىمەن ات باسىن لەكەر قاجى اتىنداعى اۋىلعا بۇرىپ، اۋىل تۇرعىندارىمەن جانە جاستارىمەن كەزدەستىك. ودان شىققان سوڭ جۇسىپبەك ايماۋىتوۆ جانە جۇمات شانين اۋىلدارىنا بارىپ، ۇلىلاردىڭ تۋعان جەرىنە تاعزىم جاسادىق. ايماۋىتوۆ اۋىلىندا كوكپاردان جارىس ۇيىمداستىرىلسا، كەيىنگى ەلدى مەكەندە اسىق اتۋ سايىسىن وتكىزدىك. سونىمەن قاتار، وسى اۋىلدارداعى كۇرەڭباي سىنشىنىڭ زيراتى، قابىلبەك، قازىرەت مەكەنىندەگى ۇلىلاردىڭ قورىمىنا، سونداي-اق، مايلىتونداردىڭ ەسكى زيراتىنا، نۇرعالي موللانىڭ مەدرەسەسى بولعان ورىنعا، ۇستا، زەرگەر، كەنشى، گەولوگ - قوسىم پىشەمبايەۆتىڭ ماڭگىلىك جاتقان جەرىنە بارىپ دۇعا وقىپ، قۇران باعىشتادىق»، - دەيدى وبلىستىق ءماسليحاتتىڭ دەپۋتاتى ورال سارتايەۆ.
سالت اتتىلاردىڭ ەندىگى باعىتى - بۇقار جىراۋ، ءماشھۇر ءجۇسىپ كەسەنەلەرىنە توقتاپ، ۇلىلاردىڭ رۋحىنا دۇعا باعىشتاۋ. ودان كەيىن ات باسىن جاياۋ مۇسا، قانىش ساتبايەۆ جانە سۇلتانماحمۇت تورايعىروۆ اۋىلدارى مەن شاكەن ايمانوۆ دۇنيەگە كەلگەن ايمانبۇلاق جەرىنە بۇرۋ. جۇرگەن جەرلەرىندە ءارتۇرلى كەزدەسۋلەر، مادەني جانە سپورتتىق شارالار ۇيىمداستىرۋدى جوسپارلاپ قويعان.
ساياحاتشىلاردىڭ قۇرامىندا وبلىستىق جانە اۋداندىق ءماسليحاتتىڭ دەپۋتاتتارى، ونەر جانە سپورت سالاسىنىڭ ماماندارى بار.
ايتا كەتەيىك، «تۋعان جەر» باعدارلاماسىن ىسكە اسىرۋعا وراي قۇرىلعان ايماقتىق جۇمىس توبىنىڭ العاشقى وتىرىسىندا دەپۋتاتتار مەن كاسىپكەرلەردىڭ، وزگە دە لاۋازىمدى قىزمەت يەلەرىنىڭ وقىعان مەكتەپتەرى انىقتاۋ جۇمىستارى قولعا الىنعان.
كەيىن ازاماتتار ءوزى ءبىلىم العان مەكەمەگە قاجەتتى ماتەريالدىق جاعدايلار جاساپ، وزگە دە كومەكتەر كورسەتە الادى.
