پۋتين نازاربايەۆقا استانا پروتسەسىندەگى كەلىسىمدەرگە بايلانىستى العىس ايتتى

بەيجىڭ. قازاقپارات - بەيجىڭدە «ءبىر بەلدەۋ، ءبىر جول» حالىقارالىق ىنتىماقتاستىق فورۋمىنىڭ قورىتىندىسىنا ارنالعان باسپا ءسوز ءماسليحاتىندا

رەسەي پرەزيدەنتى ۆلاديمير پۋتين سيرياداعى قاقتىعىستى رەتتەۋ بويىنشا استانا پروتسەسى اياسىنداعى كەلىسىمدەر ءۇشىن قازاقستان پرەزيدەنتى نۇرسۇلتان نازاربايەۆقا العىس ايتتى، دەپ حابارلايدى قىتايداعى «قازاقپارات» ح ا ا مەنشىكتى ءتىلشىسى.

«قاۋىپسىزدىككە بايلانىستى (سيرياداعى) مۇنى ىسكە اسىرىلاتىن قۇرال دەپ ەسەپتەيمىن، بارىنەن بۇرىن بۇل - سوعىستى توقتاتۋ رەجىمىن ساقتاۋ. ءىس جۇزىندە بۇگىنگى كەزەڭدەگى ەڭ باستىسى - وق اتۋدى توقتاتۋ رەجىمىن نىعايتۋ، بەكىتۋ، ال وسىنىڭ نەگىزىندە مامىلە جاساۋعا جاعداي تۋعىزۋ جانە كەلەسى ساياسي پروتسەستەرگە نەگىز قالاۋ»، - دەدى رەسەي كوشباسشىسى جۋرناليستەردىڭ ساۋالىنا جاۋاپ بەرە وتىرىپ.

ونىڭ ايتۋىنشا، ەگەر جاعداي وسى سەناري بويىنشا جالعاسار بولسا، ەلدەر العا قويعان ماقساتىنا جەتەدى دەپ ەسەپتەۋگە بولادى. ءبىراق وق اتۋ توقتاتىلماي، ساياسي پروتسەستە قانداي دا ءبىر تيىمدىلىككە قول جەتەدى دەگەن اڭگىمە بولۋى مۇمكىن ەمەس.

«بۇل كەزەڭدە تاپ وسىنى جاساۋ كەرەك. ال بۇعان قالاي قول جەتكىزۋگە بولادى؟ مىنە ءبىز استانادا وسىعان كەلىستىك. وسىنداي الاڭ ۇسىنعانى ءۇشىن قازاقستانعا جانە قازاقستاننىڭ پرەزيدەنتى نۇرسۇلتان ءابىش ۇلى نازاربايەۆقا العىس ايتامىز. ەندى ءبىز اسكەري دەڭگەيدە انكارادا (رەسەي، يران جانە تۇركيا) سيريالىق تاراپپەن ۇدايى كونسۋلتاتسيا جاساي وتىرىپ، وسى دەسكالاتسيا ايماعىنىڭ ناقتى شەكاراسىن تالقىلايتىن بولامىز، جانە ەكىنشىسى باقىلاۋ ەلەمەنتتەرى: قالاي، قاشان جانە قايدا، كىم باقىلايتىن بولادى. بۇل پراكتيكالىق، ناقتى ماسەلەلەر، ولار تالقىلاۋدى قاجەت ەتەدى جانە ول تۋرالى ايتۋعا ءالى ەرتە»، - دەپ تۇيىندەدى ۆ. پۋتين.