07:40, 16 - مامىر 2017 | GMT +5
استانادا تەرمينالداردى ۇرلاۋ قىلمىسى اشكەرەلەندى
استانا. قازاقپارات - استانا پوليتسەيلەرى تولەم تەرمينالدارىن ۇرلاۋ فاكتىسىن «ءىزىن سۋىتپاي» اشكەرەلەدى، دەپ حابارلايدى «قازاقپارات» ح ا ا ءتىلشىسى ەلوردالىق ءى ءى د باسپا ءسوز قىزمەتىنە سىلتەمە جاساپ.
«دەپارتامەنتكە قالا تۇرعىنى بەلگىسىز بىرەۋلەردىڭ دۇكەندەردىڭ بىرىندەگى تولەم تەرمينالىن ۇرلاپ كەتكەندىگى تۋرالى شاعىم ءتۇسىردى.
«قۇقىقتىڭ ءتارتىپ» جەدەل-پروفيلاكتيكالىق شارالار اياسىندا جەدەل-ىزدەستىرۋ شارالارىن وتكىزۋ بارىسىندا تەرمينالداردى ۇرلاۋمەن اينالىساتىن قىلمىستىق توپ انىقتالدى، كۇدىكتىلەردىڭ ءبىرى رەتىندە 22 جاستاعى «گازەل» كولىگىنىڭ جۇرگىزۋشىسى ۇستالدى»، - دەپ حابارلادى پوليتسيادان.
«قازىرگى تاڭدا قىلمىسقا قاتىسى بار ءۇش ادامدى ۇستاۋ بويىنشا جەدەل-ىزدەستىرۋ شارالارى جۇرگىزىلىپ جاتىر.
كۇدىكتىلەردىڭ ءبىرىنىڭ تۇرعىلىقتى مەكەنجايىنان تاعى ءبىر تولەم تەرمينالى تابىلدى. پوليتسەيلەر ولاردىڭ قالا اۋماعىندا جاسالعان وسى سيپاتتاعى قىلمىستارعا قاتىسىنىڭ بار-جوعىن انىقتاپ جاتىر»، - دەپ اقپارات بەردى ءى ءى د- دە.
