ا ق ش جۋرناليستەرى گولوۆكيندى اعىلشىن ءتىلىن ۇيرەنگەنى ءۇشىن ماقتادى

استانا. قازاقپارات - جۋرناليست دەن ەبروۋزدىڭ ايتۋىنشا، كاسىبي بوكستا حالىقارالىق جۇلدىزعا اينالۋ ءۇشىن ءتىل ءبىلىمى دە كەرەك.

ال اعىلشىن ءتىلىن ۇيرەنۋ جاعىنان الۆارەس قازاقستاندىق بوكسشى گولوۆكيننەن قالىپ كەلەدى، دەپ حابارلايدى قازاقپارات ءتىلشىسى.

«نەگىزى، بوكسشىنىڭ اعىلشىن ءتىلىن ءبىلۋ دەڭگەيى ونىڭ سپورتتىق مانسابىنا دا وڭ اسەر ەتە الادى. ول جاعىنان «كانەلو» باياۋ قيمىلداپ جاتىر. مەنىڭشە، اۋدارماشىسىز امەريكانىڭ بوكس سۇيەر قاۋىمىمەن تىكەلەي بايلانىس ورناتۋعا بولادى. گولوۆكين بولسا، الۆارەسپەن سالىستىرعاندا، كاسىبي بوكسقا كەش كەلسە دە، ءتىلدى الدەقايدا تەز مەڭگەرىپ كەتتى»، - دەپ جازدى ەبروۋز ءوزىنىڭ Boxingnews24.com سايتىنداعى باعاناسىندا.

ايتا كەتەيىك، بۇعان دەيىن ەمبروۋز گولوۆكين مەن الۆارەس اراسىنداعى كەلىسىمشارتتىڭ ماڭىزدى ءبىر بولىمىنە قاتىستى ءوز پىكىرىن بىلدىرگەن بولاتىن. وعان سايكەس، مەكسيكالىق بوكسشىعا قارىمتا كەزدەسۋگە مۇمكىندىك بەرىلىپ وتىر.

بۇل دەگەنىمىز، الۆارەس ۇتىلسا، گولوۆكين مىندەتتى تۇردە بۇعان كەلىسۋى ءتيىس. ال قازاقستاندىق بوكسشىنىڭ ءوزى جەڭىلىپ قالسا، قارىمتا كەزدەسۋدى تالاپ ەتە المايدى. دەن ەمبروۋزدىڭ ويىنشا، گولوۆكينگە «سارىباس» مەكسيكالىق جۇلدىزدى نوكاۋتپەن جەڭۋ كەرەك.

ەگەر بۇل ايقاس تا نوكاۋتپەن اياقتالسا، GGG كاسىبي بوكستىڭ عانا ەمەس، PPV رەيتينگى شىڭىنا دا شىعا الادى. گولوۆكين - الۆارەس جەكپە-جەگى 16- قىركۇيەكتە وتەدى.

وعان جانكۇيەرلەردىڭ رەكوردتىق سانى جينالادى دەگەن بولجام بار. وسى جەكپە-جەكتىڭ جەڭىمپازى WBO تۇجىرىمى بويىنشا ورتا سالماقتاعى الەم چەمپيونى بيللي دجو سوندەرسپەن (24-0, 12 ك و) كەزدەسۋى ابدەن مۇمكىن.

ول جايىندا ۇلى بريتانيالىق بوكسشىنىڭ پروموۋتەرى فرەنك ۋوررەن دە ايتىپ وتىر. YouTube-تاعى GOATBoxing ارناسى گەننادي گولوۆكين مەن ساۋل «كانەلو» الۆارەستىڭ نوكاۋتتتارىن سالىستىرىپ، ارنايى بەينەروليك جاساپ شىعاردى.

اۆتور: ارمان اسقاروۆ