مەملەكەتتىك قىزمەتشىلەر زاڭدى ءجيى بۇزا باستادى - تەكسەرىستىڭ ناتيجەسى

استانا. قازاقپارات - ق ر مەملەكەتتىك قىزمەت ىستەر جانە سىبايلاس جەمقورلىققا قارسى ءىس-قيمىل اگەنتتىگى جوسپاردان تىس تەكسەرىستەردىڭ ناتيجەسىن جاريالادى، دەپ حابارلايدى قازاقپارات ءتىلشىسى اگەنتتىكتىڭ باسپا ءسوز قىزمەتىنە سىلتەمە جاساپ.

رەسمي مالىمەتكە سايكەس، وتكەن جىلدىڭ العاشقى توقسانىمەن سالىستىرعاندا، بيىل اكىمشىلىك ىستەردىڭ سانى 7 ەسە وسكەن.

جاۋاپقا تارتىلعان مەملەكەتتىك قىزمەتشىلەردىڭ باسىم بولىگى كونكۋرستىق ىرىكتەۋ ەرەجەسىن بۇزىپ، قول استىنداعى ادامداردى مەملەكەتتىك قىزمەتتەن نەگىزسىز بوساتقان. سونداي-اق ونداي قىزمەتشىلەر قارجىلىق باقىلاۋ شارالارى مەن مەملەكەتتىك قىزمەتتى كورسەتۋ مەرزىمىن ءجيى بۇزىپ وتىرادى.

«مىسالى، بوس مەملەكەتتىك اكىمشىلىك لاۋازىمىنا ورنالاسۋعا كونكۋرستىق ىرىكتەۋ ءراسىمىن بۇزعانى ءۇشىن ق ر ينۆەستيتسيالار جانە دامۋ مينيسترلىگى كونكۋرستىق كوميسسياسىنىڭ مۇشەلەرى - كولىك كوميتەتىنىڭ ءتوراعاسى ا. اساۋبايەۆ، سىرتقى ەكونوميكالىق ىنتىماقتاستىق دەپارتامەنتىنىڭ ديرەكتورى ا. داۋلەتوۆ جانە كادر جۇمىسى دەپارتامەنتىنىڭ ديرەكتورى ك. قاسەنوۆتەرگە 30 ا ە ك (68070 تەڭگە) كولەمىندە ايىپپۇل سالىندى.

جالپى، اعىمداعى جىلدىڭ العاشقى توقسانىندا مەملەكەتتىك قىزمەت سالاسىنداعى اكىمشىلىك ىستەر بويىنشا 2 ميلليون 445 مىڭ تەڭگە بيۋدجەتكە ءوندىرىلدى»، - دەلىنگەن اگەنتتىكتىڭ رەسمي حابارلاماسىندا.

اگەنتتىك جىل باسىنان بەرى 352 تەكسەرىستى وتكىزدى. سونىڭ ناتيجەسىندە مەملەكەتتىك قىزمەت سالاسىنداعى زاڭنامانى بۇزۋدىڭ 2467 وقيعاسى انىقتالدى. اگەنتتىككە ارىزدانعان 103 ادامنىڭ قۇقىقتارى قورعالدى. 191 مەملەكەتتىك قىزمەتشى تارتىپتىك جاۋاپكەرشىلىككە تارتىلدى. بۇدان بولەك، اگەنتتىك 55 لاۋازىمدى تۇلعانى جاۋاپقا تارتتى.