قازاقستانعا ۋراندى ارتىعىمەن ءوندىرىپ نارىققا شىعارۋدىڭ قاجەتى جوق - بوزىمبايەۆ
دەپ حابارلايدى قازاقپارات.
«قازاقستان بيىل ۋران ءوندىرۋ كولەمىن 10 پايىزعا تومەندەتەدى. ول ءوز ناتيجەسىن بەرىپ تە جاتىر. ۋراننىڭ الەمدىك نارىقتاعى باعاسى كوتەرىلۋدە. ال ەندى جىل سوڭىنا دەيىن قانداي پروتسەسستەر بولاتىندىعىنا تالداۋ جاساعانىمىزدان كەيىن ءتيىستى شەشىم قابىلداۋعا ناقتى مۇمكىندىك الامىز. قازىر دەمپينگ جاساۋعا، ۋراندى ارتىعىمەن ءوندىرىپ، نارىققا شىعارۋعا ەشقانداي مۇمكىندىك جوق جانە قاجەت تە ەمەس»، - دەدى مينيستر دەپۋتاتتاردىڭ ساۋالىنا وراي.
ال 2017 -جىلدىڭ قاڭتارىندا رەسپۋبليكادا ۋران ءوندىرىسىنىڭ كولەمىن 10 پايىزعا ياعني، 22 مىڭ تونناعا دەيىن تومەندەتۋ تۋرالى شەشىمى قابىلداندى. بۇل الەمدىك ءوندىرىستىڭ 3 پايىزىن قۇرايدى. وسى شەشىمنىڭ ناتيجەسىندە الەمدىك نارىقتاعى ۋران باعاسى 20 پايىزعا قىمباتتاپ وتىر.
«2016 -جىلى ۋران ءوندىرىسىنىڭ كولەمى 24070 توننانى قۇرادى جانە 2009 -جىلمەن سالىستىرعاندا 76 پايىزعا ءوسىم كورسەتتى. قازونەركاسىپ ءوندىرۋشى كاسىپورىندارىنىڭ قۇرامىنا جاپونيا، فرانسيا، كانادا، ق ح ر، رەسەيمەن بىرلەسكەن كاسىپورىندار كىرەدى. ونداعى قازونەركاسىپ كومپانياسىنىڭ قاتىسۋ ۇلەسى - 30-دان 65 پايىزعا دەيىن. بۇگىنگى كۇنى ۋران وندىرۋمەن 12 كومپانيا، ونىڭ ىشىندە رەسەيدىڭ، فرانسيانىڭ، قىتايدىڭ ، كانادانىڭ، جاپونيا مەن قىرعىزستاننىڭ كومپانيالارىمەن بىرلەسكەن 11 كاسىپورىن اينالىسادى. قازىرگى ۋاقىتتا قازاقستاندا وندىرىلگەن ۋران تۇگەلدەي الەمدىك نارىققا، ءبىرىنشى كەزەكتە قىتايعا، ەۋروپاعا، كاناداعا جانە ا ق ش- قا ەكسپورتتالادى»، - دەدى ول.
ءمينيستردىڭ اتاپ وتۋىنشە، 2016 -جىلى الەمدىك تابيعي ۋران نارىعىندا 80 پايىز ۋران ءونىمى بەلسەندى ءوندىرىلدى. ۋراندى وندىرگەن نەگىزگى ەلدەردىڭ قاتارىندا قازاقستان، اۆستراليا، كانادا، نيگەر جانە رەسەي بار. الەمدە وندىرىلگەن ۋراننىڭ 39 پايىزى قازاقستاننىڭ ۇلەسىنە تيەسىلى.
«قازىرگى ۋاقىتتا الەمدىك ۋران نارىعىندا ۋرانعا دەگەن ۇسىنىستىڭ ارتۋى بايقالادى. بۇل ترەند 2011 -جىلدان بەرى، ول فۋكۋسيمادان كەيىنگى كەزەڭ ەدى. ترەند جالعاسۋدا. وتكەن جىلى تابيعي ۋراننىڭ باعاسى ەداۋىر تومەندەدى. باعاسى جىل ىشىندە 40 پايىزعا ءتۇستى. الەمدىك تابيعي ۋران نارىعىندا قالىپتاسقان جاعدايعا بايلانىستى 2017 -جىلدىڭ قاڭتارىندا رەسپۋبليكادا ۋران ءوندىرىسىنىڭ كولەمىن 10 پايىزعا ياعني، 22 مىڭ تونناعا دەيىن تومەندەتۋ شەشىمى قابىلداندى. بۇل الەمدىك ءوندىرىستىڭ 3 پايىزىن قۇرايدى. وسى شەشىمنىڭ ناتيجەسىندە الەمدىك نارىقتاعى ۋران باعاسى 20 پايىزعا ارتقانىن اتاپ ءوتىم كەلەدى. الايدا نارىقتاعى ۋراننىڭ ارتىق ۇلەسى 2020 -جىلعا دەيىن ساقتالادى دەپ كۇتىلۋدە. ناتيجەسىندە ۋران باعاسى قۇبىلىپ، ۇسىنىس پەن سۇرانىستىڭ تەپە- تەڭدىگى بۇزىلادى دەگەن بولجام بار. الەمدىك ۋران نارىعىنداعى قيىن جاعدايعا قاراماستان قازاقستان الەمدىك نارىققا ءوزىنىڭ باسشىلىق ۇستانىمىن ساقتاۋعا قابىلەتتى»، - دەدى بوزىمبايەۆ.
ايتا كەتەيىك، قازاقستان بارلانعان ۋران قورى بويىنشا الەمدە ەكىنشى ورىندا تۇر. بارلانعان الەمدىك قوردىڭ شامامەن 12 پايىزى ەلىمىزدىڭ جەر قويناۋىندا شوعىرلانعان.
اۆتور: مارلان جيەمباي
