قازاقستاندا كوپ ساتىلاتىن كولىكتەردىڭ ءتىزىمى جاسالدى
بۇل تۋرالى «قازاۆتوونەركاسىپ» اۆتوكولىك سالاسىنداعى كاسىپورىندار وداعىنىڭ باسپا ءسوز قىزمەتىنىڭ مالىمەتىندە ايتىلعان، دەپ حابارلايدى قازاقپارات.
بيىلدىڭ ءتورت ايىندا رەسمي ديلەرلەر 11018 جەڭىل جانە جەڭىل كوممەرتسيالىق كولىكتەردى ساتتى، بۇل كورسەتكىش وتكەن جىلمەن سالىستىرعاندا 23 پايىزعا تومەن. ءساۋىر ايىندا 3449 اۆتوموبيل ساتىلىپ، وسى دەڭگەي 2017 -جىلعى ناۋرىزعا قاراعاندا 27 پايىزعا جوعارىلادى. كومپانيا مالىمەتىندە، 4 ايدا ساتىلعان 7771 كولىك يمپورتقا (70,5 پايىز) تيەسىلى. سونىمەن بىرگە 3247 ساتىپ الۋشى (29,5 پايىز) ءوز تاڭداۋلارىن قازاقستاندىق زاۋىتتاردىڭ ونىمىنە بەرگەن.
بەلگىلى بولعانداي، قازاقستاندىقتاردىڭ اراسىندا سۇرانىسقا يە كولىكتەردىڭ كوشىن Toyota باستاپ تۇر، ياعني بيىلعى ءتورت ايدا ەل اۋماعىندا 2290 جاپوندىق كولىكتىڭ ماركاسى ساۋدالاندى. Lada ديلەرلەرى 1912 اۆتوموبيلدى وتكىزگەن كورىنەدى.
اۆتور: رۋسلان عابباسوۆ
