بەس رەت عارىشقا بارعان ۇشقىش تۋرالى تاعى ءبىر فيلم جارىققا شىقپاق

استانا. قازاقپارات - جاقىندا عانا كورەرمەندەرگە جول تارتقان عارىشتاعى ءومىر تاريحىن بەينەلەيتىن «العاشقىلار ءداۋىرى» فيلمىن وسى تاقىرىپتا ءتۇسىرىلىپ جاتقان تاعى دا ءبىر تەلەتۋىندى تولىقتىرماق، دەپ حابارلايدى «قازاقپارات» ح ا ا ءتىلشىسى.

رەسەي عارىش مەكەمەسىنىڭ باسپا ءسوز قىزمەتىنىڭ مالىمەتتەرىنە قاراعاندا، 2017 -جىلدىڭ كۇزىندە كەڭەس عارىشكەرلەرلەرىنە، ونىڭ ىشىندە كەڭەس وداعىنىڭ ەكى مارتە باتىرى، عارىشكەر- ۇشقىش ۆلاديمير جانيبەكوۆتىڭ ەرلىكتەرىنە ارنالعان «ساليۋت-7» كوركەم فيلمى جارىققا شىقپاق.

ۆلاديمير جانيبەكوۆ 1942 -جىلى 13 -مامىردا وزبەكستاندا دۇنيەگە كەلگەن. اتاقتى عارىشكەر 1978 -جىلدىڭ قاڭتارىنان باستاپ 1985 -جىلدىڭ قىركۇيەگىنە دەيىنگى ارالىقتا بەس رەت عارىشقا ۇشىپ، جالپى ۇزاقتىعى 145 كۇندى، 15 ساعاتتى 58 مينۋتتى 29 سەكۋندتى قۇرايتىن عارىش ءومىرىن باسىنان وتكىزدى.

ەكى رەت اشىق عارىشقا شىقتى. «ۆلاديمير جانيبەكوۆ ءوزىنىڭ عارىشقا بەسىنشى ساپارىن ۆيكتور ساۆينپەن بىرگە «سويۋز ت-13» اۋە كەمەسىنىڭ كومانديرى رەتىندە جاسادى. وسى ساپاردا ۆيكتور ساۆين پەن ۆلاديمير جانيبەكوۆ باسقاراتىن اۋە كەمەسى باسقارىلمايتىن وربيتا ستانساسىمەن ءتۇيىسىپ قالادى.

توتەنشە جاعدايدى جويۋ ءۇشىن قوس عارىشكەر 1985 -جىلى 2 -تامىزدا اشىق عارىشقا شىعادى. ولار وندا 5 ساعات ۇزدىكسىز جۇمىس جاسادى. وسىنداي كۇردەلى عارىش ساپارلارى «ساليۋت-7» فيلمىنىڭ سيۋجەتىندە قامتىلعان»، - دەيدى باسپا ءسوز قىزمەتى.

ۆلاديمير جانيبەكوۆ ەكى مارتە كەڭەس وداعىنىڭ باتىرى جانە كوپتەگەن مەملەكەتتىك جانە حالىقارالىق دەڭگەيدەگى ماراپاتتاردىڭ يەسى. عارىشكەردىڭ قۇرمەتىنە وزبەكستان استاناسىندا قولادان قۇيىلعان ءمۇسىن ورناتىلعان.