اقتوبەدەگى مۋزەيدە ديماشتىڭ ساحنالىق كيىمدەرى مەن قىتاي فاناتتارى تارتۋ ەتكەن سىيلىقتارى قويىلۋى مۇمكىن
سونىمەن بىرگە، قىتايداعى فاناتتارى تارتۋ ەتكەن ەرەكشە سىيلىقتارى مەن جازعان حاتتارى دا مۋزەي سورەلەرىنەن ورىن الۋى ىقتيمال.
ايتا كەتەيىك، ساناۋلى كۇن بۇرىن «اقتوبە اقپارات» ورتالىعىندا ەسەپ بەرگەن وبلىستىق مادەنيەت باسقارماسىنىڭ باسشىسى مارجان قورعانبايەۆا تانىمال ونەر ادامدارىنىڭ بۇيىمدارى اقتوبەدە بوي كوتەرىپ جاتقان مۋزەيدەن ورىن الۋ مۇمكىندىگىن جوققا شىعارمادى.
ءتىلشى ديماشتىڭ اناسى سۆەتلانا ايتبايەۆادان وسىعان قاتىستى پىكىرىن بىلگەن بولاتىن. ونىڭ ايتۋىنشا، ەگەر باستاما قولداۋ تاباتىن بولسا، ونەرلى وتباسى مۇمكىندىگىنشە مۋزەيگە كومەكتەسۋگە دايىن.
«وسىعان دەيىن ەمبى قالاسىنداعى جۇبانوۆتار مۋزەيىنىڭ ديرەكتورى ساحنالىق كيىمدەرىمىزدى سۇراتقاندا قانات ەكەۋمىزدىڭ كوستيۋمدەرىمىزدى بەرگەن بولاتىنبىز. وسى جولى جاڭا مۋزەي تاراپىنان ۇسىنىس تۇسسە، ارينە، بەرەر ەدىك. ءتىپتى، كەشەگىدە ديماشتىڭ قىتاي ساحناسىندا كيگەن كيىمدەرىن دە تارتۋ ەتەمىز»، - دەيدى سۆەتلانا ايتبايەۆا.
سونىمەن بىرگە، سۆەتلانا ايتبايەۆا قىتايدان ديماشقا فاناتتارى بەرگەن ەرەكشە سىيلىقتاردى دا مۇمكىندىگىنشە قازاقستانعا جەتكىزۋگە تىرىسقانىن ايتادى.
«قىتاي فاناتتارى حاتتار جازعان. ويىنشىقتار، البومدار سىيلادى. شامام كەلگەنشە قازاقستانعا اكەلدىم. بۇگىندە ۇلكەن قوراپقا سالىپ جيناپ قويدىم. ەگەر مۋزەيدەن ورىن تابىلسا، ارينە، كەيبىر دۇنيەلەردى ەكسپونات رەتىندە بەرۋگە دايىنبىز»، - دەيدى ول.
