الاش قايراتكەرى مۇحامەدجان تىنىشبايەۆتىڭ ەسىمى مەكتەپكە بەرىلدى
ەندى سارقان اۋدانىنىڭ قارعالى اۋىلىنداعى ءبىلىم ورداسى قوعام قايراتكەرىنىڭ ەسىمىمەن اتالادى، دەپ حابارلايدى قازاقپارات ءتىلشىسى.
12- مامىر مۇحامەدجان تىنىشبايەۆتىڭ تۋعان كۇنى. يگى ءىس الاش قوزعالىسىنىڭ 100 جىلدىعىنا تاماشا تارتۋ بولدى، دەيدى اردا تۇلعانىڭ شوبەرەسى مايگۇل قۇرمانعاليەۆا. ول باستامانىڭ جۇزەگە اسۋىنا ىقپال ەتكەن جاندارعا شەكسىز ريزاشىلىعىن ءبىلدىردى.
بۇعان دەيىن قارعالى دەپ اتالعان مەكتەپتە بۇگىندە 281 وقۋشى ءبىلىم الىپ جاتىر. مامانداردىڭ ايتۋىنشا، الاش قايراتكەرىنىڭ ەسىمىن يەلەنگەن مەكتەپ وقۋشىلارى بولاشاقتا «تىنىشپايەۆ تانۋ» ىسىنە اتسالىسپاق. ولار تۋريستىك مارشرۋت جوباسىن قولعا الدى. ياعني مۇحامەدجان تىنىشبايەۆتىڭ تابانى تيگەن ايماقتاردىڭ سىزباسىن جاساماق.
بۇل ولكەدەگى تاريحي تۋريزمدى دامىتۋعا جول بەرەدى. ال تۇلعانىڭ ۇرپاقتارى وسىناۋ باستامانىڭ بارلىعىنا قولداۋ كورسەتۋگە دايىن ەكەندىكتەرىن جەتكىزدى. سونداي-اق اۋىلدا تاريحشى، اعارتۋشى، قازاقتان شىققان تۇڭعىش تەمىر جول ينجەنەرى، الاش زيالىسىنىڭ تۋعان كۇنىنە وراي، ۆولەيبولدان وبلىستىق تۋرنير ۇيىمداستىرىلدى.
شارادا 22 توپ باق سىنادى. ولاردىڭ اراسىندا الاكول، اقسۋ اۋداندارى مەن تالدىقورعان قالاسىنىڭ كوماندالارى بار. ەندى ۇيىمداستىرۋشىلار بۇل شارانى داستۇرگە اينالدىرۋدى جوسپارلاپ وتىر.
