يسلام ىنتىماقتاستىق ويىندارى: قازاقستان قورجىنىنا العاشقى مەدال ءتۇستى
ويىننىڭ ەكى كۇنگى قورىتىندىسى بويىنشا، 64 كەلى دەيىنگى سالماقتا بوكسشىمىز قۋات قۋانوۆ قىرعىز سپورتشىسىن 3:2 ەسەبىمەن ۇتىپ، كەلەسى اينالىمعا ءوتتى. ەندى ول تۇركىمەن بوكسشىسىمەن قولعاپ تۇيىستىرمەك. ال 91 كەلىگە دەيىنگى سالماقتا سىنعا تۇسكەن تاعى ءبىر جەرلەسىمىز نۇرلان ساپارباي لوندون وليمپياداسىنىڭ جەڭىمپازى، ەۋروپا چەمپيونى، الەمنىڭ ەكى دۇركىن جۇلدەگەرى ازەربايجاندىق ماگومەدراسۋل مەدجيدوۆكە ۇپاي سانىمەن ەسە جىبەردى.
13- مامىردا دزيۋدوشىلارىمىز جارىس الاڭىنا شىقتى. 52 كەلىگە دەيىنگى سالماقتا گۇلدانا المۇحامبەتوۆا جۇلدەلى ورىنعا يە بولىپ، قازاقستان كومانداسىنىڭ قورجىنىنا العاشقى قولا مەدالدى سالدى.
ول مەدال ءۇشىن كۇرەستە وزبەك سپورتشىسىنان باسىم ءتۇستى. سونداي-اق بۇگىن جاس وسپىرىمدەر اراسىنداعى وليمپيادا جەڭىمپازى باۋىرجان جۋانتايەۆ جارىس جولىنا شىعادى. ال 66 كەلىگە دەيىنگى سالماقتا مەيىرجان قالتايەۆ يران سپورتشىسىمەن قولا جۇلدە ءۇشىن سىنعا تۇسەدى.
ەسكە سالا كەتەيىك، 12-22- مامىر ارالىعىندا ازەربايجان استاناسى باكۋدە IV يسلام ىنتىماقتاستىق ويىندارى وتەدى. ويىندارعا 54 ەلدەن شامامەن 3500 سپورتشى قاتىسۋدا. قازاقستان نامىسىن بەس سپورت ءتۇرى بويىنشا 32 سپورتشى قورعايدى. بۇعان دەيىن حابارلاعانىمىزداي، ويىندار الەمنىڭ 58 ەلىندە تىكەلەي ەفيردەن كورسەتىلۋدە.
