استانادا تۇرىكتىڭ «كوبەلەكتىڭ ءتۇسى» فيلمى كورسەتىلەدى
وسىنىڭ اياسىندا 20 - مامىردا «كوبەلەكتىڭ ءتۇسى» اتتى كينو تۋىندىنى استانا حالقىنا ۇسىنادى.
ەسكە سالا كەتەيىك، «تۇرىك فيلمدەر كۇنى» وسىدان 2 اي بۇرىن باستالعان ەدى. ناۋرىز ايىندا «سوڭعى حات»، ءساۋىر ايىندا «ۇزاق حيكايا» اتتى فيلمدەر استانالىقتارعا تارتۋ ەتىلگەن، دەپ حابارلايدى قازاقپارات.
2013 - جىلى تۇسىرىلگەن «كوبەلەكتىڭ ءتۇسى» فيلمىنىڭ سسەناريىن جازعان ءارى رەجيسسەرى يىلماز ەردوگان. باستى رولدەردى قازاقستاندا كەڭىنەن تانىمال تۇرىك اكتەرلەر كىۆانچ تاتلىتۋگ پەن مەرت فىرات سومداعان. فيلمنىڭ وقيعاسى تۇركيانىڭ زونگۋلداك قالاسىندا تۇراتىن جاس اقىندار رۇشتۇ ونۋر مەن مۋزاففەر تاييپ ۋسلۋنىڭ توڭىرەگىندە ءوربيدى. سول كەزەڭدە اقىندار ءبىلىم العان «مەحمەت چەليكەر» ليتسەيىندە ادەبيەت ءپانى مۇعالىمى بولىپ جۇمىس ىستەگەن بەحچەت نەداجيگيلدىڭ رولىندە اتاقتى تۇرىك اكتەر يىلماز ەردوگان وينايدى.
اتاپ ءوتۋ كەرەك، فيلم 2013 -جىلى 86-اكادەميالىق سىيلىق كوميسسياسى تاراپىنان «شەت تىلدەگى ەڭ ۇزدىك فيلم» نوميناتسياسى بويىنشا تۇركيا اتىنان وسكار سىيلىعىنا ۇسىنىلدى. فيلمدە 1941 -جىلدارى بولعان وقيعالار باياندالادى. ەكى جاس اقىن رۇشتۇ ونۋر مەن مۋزاففەر تاييپ ۋسلۋ زونگۋلداكتاعى كومىر شاحتاسىندا جۇمىس ىستەيدى. ەكەۋى دە ادەبيەتكە ەتەنە جاقىن. جاس تۇركيا مەملەكەتى جاڭادان جاڭعىرۋ كەزەڭىن باستان وتكەرىپ جاتقان 1940 -جىلدارى ەۆروپادا ەكىنشى دۇنيەجۇزىلىك سوعىس جالعاسىپ جاتتى. وسىنداي اۋىر كەزەڭدە ەكى جاس اقىن قۇرت اۋرۋىنا شالدىعادى. ءبىراق اۋىرتپاشىلىقتارعا قاراماستان قوس اقىن ءوز ورتالارىندا پوەزيانى ناسيحاتتاپ، ادەبيەتكە دەگەن حالىقتىڭ قىزىعۋشىلىعىن تۋعىزۋ ءۇشىن جاندارىن سالادى. مۋزاففەر فيلمدەگى باسقا ءبىر كەيىپكەر اكىمنىڭ قىزى سۋزان ءوزسويعا عاشىق. الايدا، قۇرت اۋرۋى جاستاردىڭ دەنساۋلىعىنا ۇلكەن قاۋىپ تۋعىزدى. وسى جانە باسقا سەبەپتەرگە بايلانىستى سۋزاننىڭ اتا اناسى قىزدارىنىڭ ولارمەن دوس بولۋىنا قارسى...
20 - مامىردا ساعات 17.00-دە «كەرۋەن» و س و كينوپاركتىڭ 4 - زالىندا كورسەتىلەتىن فيلمدى استانا تۇرعىندارى مەن قالا قوناقتارى تەگىن تاماشالاي الادى.
اۆتور: قانات مامەتقازى ۇلى
