تۇركى ەلدەرى اراسىندا ورتاق تەلەارنانىڭ عيماراتى تۇركىستاندا بولۋى ءتيىس - احمەت يەشيلتەپە

تۇركىستان. قازاقپارات - تۇركى الەمى ەلدەرى ب ا ق وكىلدەرىنىڭ باسىن قوسقان حالىقارالىق جۋرناليستەر فورۋمىندا ورتاق تەلەارنا اشۋ ماسەلەسى تالقىلاندى.

 جيىنعا قاتىسقان تۇركيالىق «NTV» تەلەارناسىنىڭ باعدارلاما رەداكتورى احمەت يەشيلتەپە تەلەارنانىڭ عيماراتى تۇركىستاندا بولۋى ءتيىس دەگەن ۇسىنىس جاسادى. ول ءوز ۇسىنىسىن كيەلى شاھاردا تۇركى حالىقتارىنا ورتاق قوجا احمەت ياساۋيدىڭ جاتقاندىعىمەن ءتۇسىندىردى، دەپ حابارلايدى قازاقپارات ح ا ا ءتىلشىسى.

 باسقوسۋدا ءسوز بولعان كەلەلى ماسەلە توڭىرەگىندە تۇركى كەڭەسىنىڭ جوبا جەتەكشىسى دجەيحۋن شاحۆەرديەۆ، «TRT-Avaz» تەلەارناسىنىڭ ديرەكتورى مۇرات اككوچ پەن باس كەڭسەسى بريۋسسەل قالاسىندا ورنالاسقان «EURELIZ» مەديا جانە ستراتەگيالىق كوممۋنيكاتسيالار كومپانياسىنىڭ ديرەكتورى، جۋرناليست ەلي حادجيەۆالار دا ءوز پىكىرلەرىن ءبىلدىردى. قىرعىزستاندىق «Kabar»  ۇلتتىق اقپارات اگەنتتىگى ديرەكتورىنىڭ ورىنباسارى تىنچتىك كارىمشاكوۆ پەن «حابار» اگەنتتىگى» ءتورايىمىنىڭ ورىنباسارى رينات كەرتايەۆتار دا ءوز ويلارىن ورتاعا سالدى.

 «ەلباسىمىز نۇرسۇلتان نازاربايەۆتىڭ تۇركى حالىقتارى اراسىندا ورتاق تەلەارنا قۇرۋ تۋرالى ۇسىنىس جاساعانىنا تۋرا ەكى جىل تولىپتى. وسى ەكى جىل ىشىندە ءبىزدىڭ اقپارات جانە كوممۋنيكاتسيا مينيسترلىگى وكىلدەرىنىڭ جانە تۇركى مەملەكەتتەرى دەلەگاتتارىنىڭ قاتىسۋىمەن، كوپتەگەن وتىرىستار ءوتتى. وسى ۋاقىت ارالىعىندا ارنايى جۇمىس توپتارى جينالىپ، ناقتى ۇسىنىستار ايتىلدى. ارينە، تەلەارنا قۇرۋ بۇگىنگىدەي ەكونوميكالىق داعدارىس كەزەڭىندە بىردەن جۇزەگە اساتىن دۇنيە ەمەس، ءبىراق، دەيتۇرعانمەن مەملەكەتتەردىڭ بارلىق تەلەارنالارىنىڭ، بۇقارالىق اقپارات قۇرالدارىنىڭ اۋقىمىندا بايلانىستى دامىتۋ، دەرەكتى فيلمدەرمەن الماسۋ، دايىن كونتەنتتى ءتۇرلى مەملەكەتتەردىڭ اقپارات قۇرالدارىندا كورسەتۋ بىرتىندەپ جۇزەگە اسىپ جاتىر»، - دەدى فورۋمنىڭ مودەراتورى رينات كەرتايەۆ.

 تۇركى ەلدەرى ءۇشىن اشىلاتىن ورتاق تەلەارنا قۇرۋ ماسەلەسى تۇرالى ۇسىنىستار ەسكەرىلىپ، بارلىق مەملەكەتتەردىڭ مينيسترلىكتەرىنە جولداناتىن بولدى. بۇل ماسەلە سونداي- اق «ەكسپو -2017» حالىقارالىق كورمە اياسىندا وتەتىن ەۋرازيالىق مەديافورۋمدا تالقىلانباق. بۇگىنگى باسقوسۋ سوڭىندا سونداي- اق تۇركىتىلدەس مەملەكەتتەر اراسىندا اقپارات الماسۋدىڭ تيىمدىلىگىن ارتتىرۋ ماقساتىندا بۇقارالىق اقپارات قۇرالدارىنىڭ وكىلدەرى ءوزارا تاجىريبە الماسىپ، الداعى ۋاقىتتا تىعىز قارىم- قاتىناستا جۇمىس جاساسۋ تۋرالى كەلىسىمگە كەلدى.

 اۆتور: اينۇر اقبايەۆا