ەلوردادا اشىق اسپان استىندا جاتتىعۋ جاساۋ ماۋسىمى باستالادى
اتالعان شارا «Outdoor Sport Area» فورماتىندا وتەدى. دەمەك، جاپپاي جاتتىعۋلار اشىق اسپان استىندا جاسالادى. بۇل تۋرالى استانا قالاسىنىڭ مادەنيەت، مۇراعاتتار جانە قۇجاتتاما باسقارماسىنىڭ باسپا ءسوز قىزمەتى ءمالىم ەتتى، دەپ حابارلايدى Baq.kz.
استانانىڭ ۇزدىك سپورت جاتتىقتىرۋشىلارى تەگىن جاتتىعۋلاردى 5 باعىت بويىنشا جۇرگىزەدى: Cross-Fit, برازيليالىق دجيۋ- دجيتسۋ، Zumba, Combat-battle جانە يوگا. ءبىرىنشى جاتتىعۋ استانالىق ساياباقتا وتەدى.
21 - مامىردان باستاپ «جەرۇيىق» ساياباعىندا CrossFit ەلەمەنتتەرىمەن ءبىر ساعاتتىق جاتتىعۋ وتكىزىلەدى. بۇدان باسقا، Zumba جانە ءداستۇرلى دجيۋ- دجيتسۋ جاتتىعۋلارىنا قاتىسۋعا بولادى. «ستۋدەنتتىك» ساياباقتا اتالعان باعىتتاردان باسقا تاي بوكسىنان جاتتىعۋلار ۇيىمداستىرىلادى.
اشىق اسپان استىنداعى جاتتىعۋلار جاز بويى «استانالىق» ، «جەرۇيىق» جانە «ستۋدەنتتىك» ساياباقتاردا ءار جەكسەنبى سايىن ساعات 10:00-13:00 ارالىعىندا وتەدى. حالىقتى سالاۋاتتى ءومىر سالتىن ۇستانۋعا جانە دەنە شىنىقتىرۋمەن اينالىسۋعا تارتۋعا باعىتتالعان «Fitness Park Astana» سپورتتىق- بۇقارالىق شاراسى ەكىنشى جىل قاتارىنان ۇيىمداستىرىلىپ وتىر.
