كىتاپتى كوپ وقۋ ءۇشىن نە ىستەۋ كەرەك؟
ءسىز سونشا وقۋعا تىرىسساڭىز دا وندىرە وقي الماي ءجۇرسىز بە؟ وندا، كەلەسى كەڭەستەرىمىز ءسىز ءۇشىن. نازار سالا وتىرىڭىز!
جاڭا كىتاپتى باقىلاپ ءجۇرىڭىز!
ءار اي سايىن ادەبي كىتاپتار جاڭا كىتاپپەن تولىعىپ وتىرادى. كىتاپ دۇكەندەرىنە، كىتاپحاناعا باس سۇقساڭىز، كورەسىز. جاڭا كىتاپتاردى مەيلىنشە ۇنەمى قاداعالاپ، وزىڭىزگە ۇناعانىن مۇمكىندىگىنشە كوبىرەك وقۋعا تىرىسىڭىز.
وقۋعا ارنايى ۋاقىت ءبولىڭىز!
بارلىق گادجەتتى 1 ساعاتقا ءوشىرىپ، ىڭعايلى ورىنعا وتىرىپ وقۋعا باس قويىڭىز.
ەسىڭىزدە بولسىن، كۇنىنە 1 ساعات ۋاقىت ارناماساڭىز، ءبىر اپتادا ءبىر كىتاپتى ءبىتىرۋ مۇمكىن بولماي قالۋى مۇمكىن. تىم قۇرىعاندا 1 ساعاتىڭىزدى وقۋعا قيىڭىز. كەيىن وسىنى ادەتكە اينالدىرساڭىز، ايىنا قانشاما كىتاپتى كەمىرىپ تاستاعانىڭىزدى بايقاماي قالاسىز...
ۇنەمى قولىڭىزدان كىتاپ تۇسپەسىن!
ۇنەمى قولىڭىزدان كىتاپ تۇسپەسىن، ياعني ىلعي وزىڭىزبەن بىرگە كىتاپ الىپ ءجۇرىڭىز. قولىڭىزدا بولسا، وقۋعا نيەت تانىتاسىز. قولىڭىز قالت ەتكەندە 10-15 مينۋتتان وقىساڭىز دا، سول ءسىز ءۇشىن جەتىستىك.
وقىعان كىتابىڭىز جايلى دوستارىڭىزبەن پىكىرلەسىڭىز!
كىتاپتى وقۋ بار جانە ونى ءسىڭىرۋ بار. ءسىز تۇسىنبەگەن شىعارمانى بالكىم دوسىڭىز تۇسىنگەن شىعار نەمەسە كەرىسىنشە. دوسىڭىزدىڭ ويى سىزدىكىنەن مۇلدە بولەك بولۋى مۇمكىن.
وقىعان شىعارمانى ءسىز ءبىر قىرىنان تانىساڭىز، ول ەكىنشى ءبىر قىرىنان تانۋى عاجاپ ەمەس. سول سەبەپتەن دە، وقىعانىڭىزدى تولىق ءسىڭىرۋ ءۇشىن وزگەنىڭ پكىرىن ءبىلۋ ماڭىزدى. ەستە ساقتايتىن نارسە، ءبىلىم ءوزىمىز ءۇشىن قاجەت. ۇنەمى دامۋدى ويلاعان كەزدە عانا ناتيجە شىعادى. ەندەشە، ىسكە ءسات، جاس دوس!
Massaget.kz
