الەمدى تاڭداندىرعان اباي سوزدەرى
جۋىقتا الەۋمەتتىك جەلى بەتتەرىندە شەتەلدىكتەر اراسىندا ۇلكەن قىزىعۋشىلىق تۋدىرعان، ابايدىڭ اعىلشىن تىلىنە اۋدارىلعان قارا سوزدەرى مەن اقىن بەينەسى يلليۋستراتسيالانعان «Abai cartoons» دەپ اتالاتىن جوبا ورنالاستىرىلا باستادى.
يدەيانىڭ اۆتورى گارۆارد ۋنيۆەرسيتەتىنىڭ تۇلەگى، قازىر انگليادا ماگيستراتۋرادا ءبىلىم الىپ جاتقان ءديدار ەسىمدى قىز. اباي مۇراسىن شەتەلدىك جاستارعا دارىپتەۋدى ماقسات تۇتقان ول - جازۋشى، فيلولوگ ءارى يلليۋستراتور.
«ايقىن» رەسپۋبليكالىق قوعامدىق گازەتى (اۆتورى - اقبوتا يسلامبەك) ءديداردى ىزدەپ- تاۋىپ، ودان جوبا جايلى، جات ەلدىك جۇرتشىلىقتىڭ اباي تانىمىن قابىلداۋى جايلى ءبىلدى. سۇحباتتى نازارلارىڭىزعا ۇسىنامىز.
- اباي مۇراسىن وسىلايشا، بۇگىنگى زامان تىنىسىنا ساي جاڭعىرتۋ يدەياسى قايدان كەلدى؟
- Abai cartoons جوباسى - مەنىڭ قازاق ادەبيەتى مەن مادەنيەتىن الەمدەگى جاستارعا قىسقا دا نۇسقا يلليۋستراتسيالار ارقىلى جەتكىزگىم كەلگەنىنىڭ ناتيجەسى. بوس ۋاقىتىمدا ۇنەمى سۋرەت سالۋمەن اينالىساتىنمىن. ماماندىعىم فيلولوگ بولعاننان سوڭ، وسى ەكى كاسىبىمدى ماعىنالى جوبادا قولدانعىم كەلدى. العاشقى جۇمىستارىمدى دوستارىممەن ءبولىستىم. ولار بۇل باستامامدى قولداپ، كوپشىلىكپەن بولىسۋگە كەڭەس بەردى. ءبىر ءتۇننىڭ ىشىندە instagram الەۋمەتتىك جەلىسىندەگى Abai cartoons اتتى پاراقشاما بىرنەشە مىڭ ادام جازىلىپ، سۋرەتتەرىمدى مىڭداعان ادام ءوز پاراقشالارىندا جاريالادى. وسىلاي كۇتپەگەن جەردەن Abai cartoons جوباسى ءوزىنىڭ وقىرماندارىن تاپتى.
- پاراقشاڭىزدان الەمنىڭ تۇكپىر- تۇكپىرىندە ابايدىڭ قارا سوزىمەن ءسىزدىڭ اشىق حاتتارىڭىزدى ۇستاپ تۇسكەن جاستاردى بايقادىق. ابايدىڭ فيلوسوفياسىن شەتەلدىك جۇرتشىلىق قالاي قابىلداۋدا؟
- ابايدىڭ دانا سوزدەرى - قازاقتىڭ تەڭدەسى جوق بايلىعى. وسى بايلىعىمىزدى اعىلشىن تىلىندە سويلەيتىن وقىرماندارعا جاڭاشا تۇردە جەتكىزگەننەن سوڭ، الەمنىڭ تۇكپىر- تۇكپىرىندەگى جاستارىمىزدان حاتتار الا باستادىم. ولار ابايدىڭ اشىق حاتتارىن وزدەرىمەن بىرگە الا ءجۇرىپ، سۋرەتتەرىمەن ءبولىستى. وسىدان traveling Abai نەمەسە «ساياحاتشى اباي حەشتەگى» پايدا بولدى. جالپى، Abai cartoons جوباسى شەتەل سايتتارىندا كوپ جاريالاندى. ءبىر ەستە قالعانى، ۆەتنامداعى گازەت مەنىڭ اشىق حاتتارىم جايلى «ماڭگىلىك وشپەيتىن دانالىق سوزدەر ەكەن» دەپ جازىپتى. اباي - الەم مويىنداعان ۇلى تۇلعا. ءوزى ومىردەن وتسە دە، ارتىنا ولمەس ءسوز قالدىرعان اتامىزدىڭ ونەرىن ماقتان تۇتۋ جانە كەلەشەك ۇرپاققا ناسيحاتتاۋ - ءبىزدىڭ بورىشىمىز.
- جىراقتا جۇرگەن قازاقتاردىڭ جوباعا ارالاسۋى قالاي؟
- جوعارىدا ايتىپ وتكەندەي، جاستار كوپتەگەن ۇسىنىس حاتتار جىبەرەدى. شامام كەلگەنشە ولاردىڭ باستامالارىنا قولداۋ كورسەتىپ وتىرامىن. كەيبىر ۇسىنىستار ءتۇرلى مادەني ورتالىقتار مەن ەلشىلىكتەردە ۇيىمداستىرىلعان جوبالارعا قاتىسۋعا مۇمكىندىك بەردى.
- نەلىكتەن جوبا اۆتورى رەتىندە ءوزىڭىز جايلى كوپ ايتا بەرمەيسىز؟
- بۇل تىكەلەي اباي شىعارماشىلىعىنا ارنالعاندىقتان، جۇرتشىلىقتىڭ مەنى تانۋى مىندەتتى ەمەس. سەبەبى، مۇنداعى باستى قۇندى دۇنيە ابايدىڭ قارا سوزدەرى بولسا دەيمىن. ءوزىمدى اباي مۇراسىن حالىققا جەتكىزۋشىمىن دەپ سانايمىن. بارلىق سۋرەتتەرىمدە اۆتورلىق قۇقىعىمدى قورعايتىن Didar KM دەگەن قولتاڭبام بار.
- اڭگىمەڭىزگە راقمەت!
