ا ق ش اۋعانستانداعى اسكەرىن نەگە كوبەيتىپ جاتىر؟

استانا. قازاقپارات - ناتو اۋعانستانداعى اسكەري كۇشتەرىن قايتادان كوبەيتۋدى قولعا الىپ جاتىر.

سەبەپ بەلگىلى. باتىس ەلدەرىنىڭ اسكەري ساراپشىلارى «قازىر اۋعان ۇكىمەت اسكەرىمەن وعان قارسى تۇرعان «تاليبان» سودىرلارىنىڭ ارا سالماعى بىردەي. ءتىپتى قارۋ-جاراقتارى دا سالىستىرمالى تۇردە قاراعاندا ءبىر-بىرىنەن اسىپ بارا جاتقانى شامالى. بۇل وتە قاۋىپتى جاعداي.

كەز كەلگەن ۋاقىتتا «تاليبان» قارسى شابۋىلعا شىعىپ اۋعان جەرىنىڭ كوپ اۋماعىن باسىپ الۋعا مۇمىندىگى جەتەدى. بۇدان تىس قازىر بۇل ەلدىڭ تەرريتورياسىن سيريا مەن يراك جەرىندە جەڭىلىسكە ۇشىراعان «يسلام مەملەكەتى» لاڭكەستەرى ورداسىن قۇرا باستادى.

وسىلايشا، ەكى باستى اجداھا اۋعان جەرىندە باس كوتەرۋدە. بۇل تەك اۋعانستان ءۇشىن عانا ەمەس، بۇكىل ورتا ازياعا ۇلكەن قاتەر» دەسەدى. وسىنىڭ ءبارىن تارازىعا تارتقان ناتونىڭ باس حاتشىسى يەنس ستولتەنبەرگ ءساۋىر ايىندا «اۋعانستانداعى كواليتسيا كۇشتەرىن كوبەيتۋدە جەدەل تۇردە قولعا الۋ كەرەك» دەگەن مالىمدەمە جاساعان.

ەندى سونى ىسكە اسىرۋ جۇزەگە اسا باستادى. ءبىر ەسكەرتە كەتەتىن جايت، قازىر ول ەلدىڭ تەرريتورياسىندا ناتونىڭ 13 مىڭ اسكەرى تۇر. ونىڭ 9 مىڭى ا ق ش ساربازدارى.

جاقىن ارادا ا ق ش اۋعانستانعا قوسىمشا 5 مىڭ جاۋىنگەر اتتاندىرعالى وتىر. ءبىراق 20 مىڭعا تاياۋ اسكەر ول ەلدە تىنىشتىق ورناتا الا ما؟ باستى ماسەلە وسى.

ويتكەنى، 2014-جىلى ول ەلدەن كواليتسيا كۇشتەرى شىعارىلعانعا دەيىن 100 مىڭ اسكەر تۇردى. بۇعان 200 مىڭعا تاقاۋ جەرگىلىكتى اۋعان ارمياسىن قوسىڭىز.

وسىنىڭ ءوزى «تاليبانعا» جويقىن كۇش كورسەتە الماعان. ەندىگى جاعداي قالاي بولماق؟ بەلگىسىز.

سونىمەن 2014-جىلى اۋعان جەرىندە ميسسياسىن اياقتاعان ناتو ول ەلدە شامالى عانا قارۋلى كۇشتەرىن قالدىرىپ، قالعان اسكەرىن شىعارعان. ەندى كەلىپ اسكەرىن قايتادان بىرتىندەپ كوبەيتۋدى قولعا الىپ وتىر. نەگە؟

«ەڭ باستىسى باتىس ءۇشىن اۋعان جەرىندە ۇكىمەتكە قارسى كۇرەس جۇرگىزىپ وتىرعان «تاليبان» ەمەس. ماسەلە، ناتو ول ەلدەگى اسكەرىن كوبەيتۋدەگى ەسەبى، سول جەردە وتىرىپ، ءۇندىستان، قىتاي، پاكىستان، يران سەكىلدى ەلدەردى باقىلاۋدا ۇستاۋ.

سوڭعى بىرەر ايدا يرانمەن ا ق ش اراسى قايتادان سالقىن تارتا باستادى. بۇل دا ەسەپتە تۇر. سونداي-اق اۋعانستان بيلىگىمەن رەسەي قارىم-قاتىناستى كۇشەيتۋدە. ا ق ش ول ايماققا رەسەيدى كىرگىزبەۋ ماسەلەسى تۇر. وسىنىڭ ءبارىن تارازىعا تارتقان ا ق ش اۋعان جەرىندەگى بازاسىن كۇشەيتۋدى قايتا قولعا الىپ جاتىر» دەيدى ساراپشىلار.

اينۇر قازىكەنوۆا

«ايقىن»