پاۆلودار تۇرعىنى كەزدەيسوق قيماق داۋىرىنە ءتان قابىر تاۋىپ الدى - فوتو

استانا. قازاقپارات - پاۆلودار وبلىسى ەرتىس اۋدانى ەرتىس اۋىلىنىڭ تۇرعىنى جەر قازىپ جاتىپ الىپ جانۋاردىڭ سۇيەگىن تاۋىپ الدى.

كۋاگەرلەر ونى باستاپقىدا دينوزاۆردىڭ سۇيەگى ەكەن دەپ قالعان، دەپ جازادى pavon.kz سايتى.

ەسكى مولانى تاۋىپ العان ولەگ كاراماننىڭ وتباسى 15 جىلدان بەرى ەرتىس اۋىلىندا تۇرىپ كەلەدى. ولار ءۇي سالۋ ءۇشىن جەر قازىپ جاتىپ كەزدەيسوق 2 مەتر تەرەڭدىكتەن الىپ جانۋاردىڭ سۇيەگىن تاپقان. شۇڭقىردان تابىلعان جانۋاردىڭ سۋرەتىن تۇرعىندار ب ا ق وكىلى ارقىلى پوتانين اتىنداعى ولكەتانۋ مۋزەيىنىڭ ارحەولوگى گەورگي پەرەسۆەتوۆكە جولداعان. جانۋار سۇيەگىمەن ءجىتى تانىسقان گەورگي پەرەسۆەتوۆ تابىلعان سۇيەكتىڭ جىلقىعا تيەسىلى ەكەندىگىن ناقتىلادى.

ارحەولوگ ول جەردە ەجەلگى قيماق مەملەكەتى كەزىندەگى قابىر بولۋى مۇمكىن دەپ جورامالداپ وتىر. «ورتا عاسىرداعى قيماق مەملەكەتىندە ولگەن ادامدى اتپەن بىرگە جەرلەۋ عۇرپى بولعان. مايىتپەن بىرگە جىلقىنىڭ تەك باسىن، كەي كەزدەرى جىلقىنى بۇتىندەي، سونداي- اق تەرىسىمەن بىرگە جەرلەيتىندىگىن ارحيولوگيالىق زەرتتەۋلەر ناقتىلاي تۇسەدى»، - دەيدى گەورگي پەرەسۆەتوۆ.

ءوز كەزەگىندە ارحەولوگ تۇرعىندار كەزدەيسوق تاۋىپ العان شۇڭقىردىڭ مولاعا وتە ۇقسايتىندىعىن جانە ول جەردە باسقا دا سۇيەكتەردىڭ، ونىڭ ىشىندە ادامنىڭ دا سۇيەگىنىڭ بولۋى ابدەن مۇمكىن ەكەندىگىن ايتادى.

اۆتور: ەربول جانات