قاراقۇرلىقتا قازاق كۇرەسىنەن بىرىنشىلىك وتەدى
بۇل تۋرالى دۇنيەجۇزىلىك قازاق كۇرەسى فەدەراتسياسى ءمالىم ەتتى. وسىمەن ەكىنشى مارتە ۇيىمداستىرىلعالى وتىرعان دوداعا الەمنىڭ 15 ەلىنەن جينالعان بالۋاندار ءۇش سالماق (70, 80, +80 كەلى) دارەجەسى بويىنشا كۇش سىناسادى.
بيىلعى چەمپيوناتتا تورەشىلەرگە ارنالعان سەمينار دا بولادى. دۇنيەجۇزىلىك قازاق كۇرەسى فەدەراتسياسىنىڭ ءبىرىنشى ۆيتسە-پرەزيدەنتى سەرىك توكەيەۆتىڭ ايتۋىنشا، جيىندا ۇيىمنىڭ تورەشىلەرى افريكالىقتارعا ءتول كۇرەسىمىزدىڭ ەرەجەلەرىن ۇيرەتىپ، تاجىريبەلەرىمەن بولىسەدى.
سونداي-اق، سەرىك توكەيەۆ: «جاقىن كۇندەرى افريكادا ۇلتتىق كۇرەسىمىزدەن قۇرلىقتىق چەمپيونات وتكىزەمىز. بۇل - دۇنيەجۇزىلىك قازاق كۇرەسى فەدەراتسياسىنىڭ كەيپتاۋندا ەكىنشى رەت ۇيىمداستىرىپ جاتقان جارىسى. ءبىرىنشى چەمپيونات ەرەسەكتەر اراسىندا 2013-جىلدىڭ 26- اقپان مەن 3- ناۋرىز ارالىعىندا بولعان ەدى. سول كەزدە جارىسقا وڭتۇستىك افريكا رەسپۋبليكاسى، زيمبابۆە، بوتسۆانا، سۆازيلەند، گابون مەن نيگەريا مەملەكەتتەرىنىڭ بالۋاندارى قاتىسقان.
ال بيىلعى دودادا 6 ەمەس، ەندى 15 ەلدىڭ وكىلدەرى باق سىناسادى. ونىڭ تاعى ءبىر ەرەكشەلىگى، چەمپيونات ەرلەر جانە ايەلدەر اراسىندا وتەدى. جاڭا ايتقان ەلدەردىڭ سپورتشىلارى جارىسقا تاعى دا قاتىسامىز دەپ بەلىن بۋىپ وتىر. ودان باسقا سەيشەل ارالدارى، ماۆريكي، كونگو دەموكراتيالىق رەسپۋبليكاسى، بەنين، مالاۆي، ناميبيا، ۋگاندا مەن وڭتۇستىك افريكا رەسپۋبليكاسىنىڭ گوتەنگ، شىعىس كەيپ، سولتۇستىك كەيپ جانە باتىس كەيپ پروۆينتسيالارى جەكە كوماندا بولىپ قاتىسادى»، - دەپ اتاپ ءوتتى.
اۆتور: كۇنسۇلتان وتارباي
