ديماش قۇدايبەرگەن قىتايدىڭ شينحۋا اگەنتتىگىنە سۇحبات بەردى

استانا. قازاقپارات - قازاقستاندىق جاس ءانشى ديماش قۇدايبەرگەن قىتايداعى جەتىستىكتەردەن سوڭ، تىڭدارمانداردىڭ وزىنەن كوپ نارسە كۇتەتىنىن جانە مۇنىڭ ۇلكەن جاۋاپكەرشىلىك ەكەنىن مويىندادى،

دەپ حابارلايدى شينحۋا اگەنتتىگى.

قىتايدىڭ شينحۋا اگەنتتىگىنە ديماش: «مەن مۋزىكا ارقىلى ەكى ەلدىڭ مادەنيەتىن جاقىنداستىرىپ، حالىقتارىمىز اراسىنداعى دوستىقتى نىعايتقىم كەلەدى»، - دەپ سۇحبات بەردى.

تانىمالدىق

«ونىڭ بويىنان ۇلى دالا مىنەزى، قازاق حالقىنىڭ مادەنيەتى ەسىپ تۇرادى. بۇل ارينە، قىتايلىق كورەرمەندەردىڭ قىزىعۋشىلىعىن وياتتى»، - دەدى قازاقستانداعى قىتاي ەلشىسى جاڭ حانحۋەي قىتايدا وتكەن «مەن ءانشىمىن-2017» كاسىبي انشىلەر بايقاۋىنىڭ جۇلدەگەرى 22 جاستاعى ديماش قۇدايبەرگەننىڭ ونەرىنە باعا بەرە وتىرىپ. ەڭ جاس قاتىسۋشى بولا تۇرا، ديماش تەك سيانگاندىق تانىمال ءانشى لين يليانگە جول بەرىپ، ەكىنشى ورىن الدى.

بايقاۋ وتكەن بىرنەشە ايدىڭ ىشىندە قىتاي مەن قازاقستاندا جانە وزگە دە مەملەكەتتەردە قازاقستاندىق ءانشىنىڭ ميلليونداعان تابىنۋشىلارى پايدا بولدى. قىتاي مۋزىكالىق قاۋىمداستىعى ديماشتىڭ شىعارماشىلىعىن ەرەكشە باعالادى، ول «ازيانىڭ تانىمال ءانشىسى» نوميناتسياسى بويىنشا بەدەلدى Top Chinese Music Awards جۇلدەسىن جەڭىپ الدى.

قازاقستاندا ديماشتى ەل ماقتانىشى دەپ اتايدى. «ول حالقىمىزدىڭ مادەنيەتىن ايداي الەمگە تانىتتى. بۇل ناعىز كۇش»، - دەدى ق ر پارلامەنتى سەناتىنىڭ ءتوراعاسى قاسىم- جومارت توقايەۆ.

بىرەگەي داۋىس، مىنەز، قىتايلىق پروديۋسەرلەردىڭ كاسىبيلىگى، قىتايلىق كورەرمەندەردىڭ ونەردى باعالاي الۋى، دامىعان الەۋمەتتىك جەلى جانە وزگە دە كوپتەگەن فاكتورلار جاس ورىنداۋشىنىڭ تانىمال بولۋىنا سەپتىگىن تيگىزدى دەپ جازىلىپ ءجۇر.

سونداي- اق، فاناتتاردى ءانشىنىڭ قازاق حالقىنىڭ مادەنيەتىنە دەگەن ەرەكشە ماحابباتى، ونى الەمگە تانىتسام دەگەن ىنتا- ىقىلاسى ءسۇيسىنتتى. بايقاۋ كەزەڭدەرىنىڭ بىرىندە ديماش قازاقتىڭ حالىق ءانى «دايديداۋدى» ورىنداپ، ءنومىردى «اداي» كۇيىمەن باستادى.

«تىڭدارماندار بەيتانىس ءان ايتىلعاندا توسىرقاپ قالمادى، كەرىسىنشە تەز ءارى وڭاي قابىلدادى. قالىڭ جۇرتشىلىق بۇل انگە قىزىعۋشىلىق تانىتتى»، - دەدى ديماش. ونىڭ ايتۋىنشا، بۇل انشىگە «مۋزىكادا شەك جوق ەكەنىن تاعى ءبىر رەت ۇعىنۋعا مۇمكىندىك بەردى».

ءوزارا قىزىعۋشىلىق

«ديماشتىڭ ارقاسىندا، ونىڭ تۋىپ- وسكەن ەلى تۋرالى كوبىرەك بىلگىم كەلەدى»، - دەيدى 19 جاستاعى قىتاي قىزى لۋ لۋ. تالانتتى، سونداي- اق وتە سىپايى ءانشى قىتايلىقتاردىڭ، اسىرەسە جاستاردىڭ قازاقستانعا دەگەن قىزىعۋشىلىقتارىن وياتتى.

دەگەنمەن، مۇنداي قىزىعۋشىلىقتى ءبىرجاقتى دەپ ايتا الماس ەدىك.

«قازاقستاندىق ورىنداۋشىنى كورشىلەس ەلدىڭ لايىقتى باعالاۋى قىتايدىڭ دا قازاق قوعامىندا جىلى قابىلدانۋىنا ىقپال ەتتى»، - دەپ پىكىر ءبىلدىردى حالىقارالىق قاتىناستار بويىنشا قازاقستاندىق ساراپشى دانيار قوسنازاروۆ.

ول «جىبەك جولىنىڭ ەكونوميكالىق بەلدەۋى» ىسكە قوسىلعان سوڭ، قازاقستان مەن قىتاي قارىم- قاتىناستارىنىڭ كەڭەيە تۇسكەنىن اتاپ ءوتتى. ەكى ەلدىڭ جوعارى وقۋ ورىندارى، ساراپتامالىق ورتالىقتار، جەرگىلىكتى بيلىك ورگاندارى، مۋزەيلەر جانە شىعارماشىلىق ۇيىمدار دەڭگەيىندە ءوزارا ارەكەتتەستىك پايدا بولدى. «مۇنداي ءارتاراپتاندىرىلعان ءوزارا ارەكەتتەستىك كوبەيگەن سايىن، مەملەكەتارالىق قارىم- قاتىناستار دا نىعايا تۇسەدى»، - دەپ جازدى ول «ۆلاست» ينتەرنەت- جۋرنالىنا.

ەسكە سالا كەتسەك، 2013 -جىلدىڭ قىركۇيەك ايىندا قازاقستانعا مەملەكەتتىك ساپارمەن كەلگەن ق ح ر ءتوراعاسى شي جينپيڭ جىبەك جولىنىڭ ەكونوميكالىق بەلدەۋىن قۇرۋدى ۇسىندى. ءبىر جىلدان كەيىن قازاقستان پرەزيدەنتى نۇرسۇلتان نازاربايەۆ «نۇرلى جول» جاڭا ەكونوميكالىق ساياساتىن ۇسىندى. ەكى ەل «بەلدەۋ مەن جول» باستاماسىن «نۇرلى جول» باعدارلاماسىمەن توعىستىرۋعا كىرىسىپ كەتتى.

17 - ءساۋىر كۇنى بەيجىڭدە وتكەن قازاقستان مەن قىتاي اراسىنداعى ديپلوماتيالىق قارىم- قاتىناستار ورناتۋدىڭ 25 جىلدىعىنا ارنالعان كونسەرت «جارقىن جىبەك جولىنداعى كەزدەسۋ» دەپ اتالدى. وندا ديماش قۇدايبەرگەن مەن وزگە دە تانىمال قازاقستاندىق ورىنداۋشىلار قىتاي تەلە جانە راديوتاراتۋىنىڭ سيمفونيالىق وركەسترىمەن بىرگە ونەر كورسەتتى.

قىتايمەن تانىسۋ

بۇعان دەيىن «ءانشى» بايقاۋىنا قاتىسىپ جۇرگەن قازاقستاندىق ءانشى چىڭدۋعا (قىتايدىڭ وڭتۇستىك- باتىسىنداعى سىچۋان پروۆينتسياسىنىڭ اكىمشىلىك ورتالىعى) بارىپ، قىتاي مادەنيەتىنىڭ سۇلۋلىعى مەن بىرەگەيلىگىن ساقتاۋعا شاقىراتىن «مەن قىتايدامىن» جوباسىنىڭ رەسمي وكىلى اتاندى. ءانشى پاندالارمەن «تىلدەسىپ»، چىڭدۋدىڭ مادەني ەرەكشەلىكتەرىمەن تانىس بولدى جانە سىچۋاندىق حوگودان (قىتايلىق ساماۋرىن) ءدام تاتتى.

ايتپاقشى، ديماش اشى تاعامداردى ۇناتاتىنىن، كوپتەگەن قىتايلىق تاعامداردى ءسۇيسىنىپ جەيتىنىن ايتتى. «مەن قىتايلىقتاردىڭ دوڭگەلەنگەن ۇستەلگە ءبىر مەزگىلدە بىرنەشە تاعامدى قوياتىنىن، ءبىر وتىرعاندا بىرنەشە تاعامنىڭ ءدامىن كورۋگە بولاتىنىن بىلەمىن. بۇل وتە قىزىقتى. ادەتتە بىزدە ءبىرىنشى تاعامدى جەپ بولعان سوڭ، ەكىنشىسىن اكەلەدى. قىتايدا ەشقانداي رەتتىلىك ساقتالمايدى، كەز كەلگەن تاعامدى از- ازدان جەپ كورىپ، تويىپ قالامىن»، - دەپ ديماش قىتايلىق اسحانا تۋرالى اسەرلەرىمەن ءبولىستى.

«ءبىزدىڭ ەلدەردىڭ مادەنيەتتەرى ءار ءتۇرلى، ءارقايسىسىنىڭ وزىندىك ەرەكشەلىكتەرى بار. قىتايلىقتارمەن ەتەنە ارالاسىپ، ولاردىڭ قوناقجايلىلىعىن، بايىپتىلىعىن، سىپايىلىعى مەن وزگە دە تاماشا قاسيەتتەرىن كورگەنىم ءۇشىن ءوزىمدى باقىتتى سانايمىن»، - دەدى ول.

جوسپارلارى تۋرالى

استاناداعى «ەكسپو-2017» حالىقارالىق مامانداندىرىلعان كورمەسى اياسىندا ديماشتىڭ جەكە كونسەرتى وتەدى. بۇل كونسەرت ونىڭ قازاقستانداعى جانە الەمنىڭ وزگە ەلدەرىندەگى كونسەرتتىك تۋرىنىڭ باستاماسى بولماق.

«قىتايعا كونسەرتتىك تۋرمەن بارۋدى اسىعا كۇتىپ ءجۇرمىن. بۇل تىلەگىم جاقىن ارادا ورىندالارىنا ۇمىتتەنەمىن»، - دەپ تولىقتىردى ديماش.