قازاقستاننىڭ كيەلى جەرلەرىنىڭ كارتاسى ءبىر-ەكى ايدا دايىن بولادى - مينيستر مۇحامەدي ۇلى
«قازىرگى كەزدە اتالعان كارتا بويىنشا جۇمىس توبىن جاساقتاپ جاتىرمىز. ابىروي بولعاندا، بىزدە ولكەتانۋشىلار مەن گەوگرافتار قاۋىمداستىقتارى بار. بۇدان بولەك، وزدىگىمەن ەكسپەديتسياعا شىعىپ جۇرگەن عالىمدارىمىز دا از ەمەس. ال ناقتى كيەلى جەرلەردىڭ كارتاسى جايىندا ايتار بولساق، جىلدىڭ اياعىنا دەيىن ءبىز اتالعان كارتانىڭ البومىن دايىنداپ شىعارامىز. ارينە، ءبىز ونى ەلەكتروندى فورماتقا دا اۋىستىراتىن بولامىز»، - دەدى مۇحامەدي ۇلى جۋرناليستەرگە بەرگەن سۇحباتىندا.
ونىڭ ايتۋىنشا، قازاقستاننىڭ كيەلى جەرلەرىنىڭ كارتاسىن جاساۋعا كوپ اقشا كەتپەيدى. مينيسترلىك بارلىق شىعىنداردى ءوز بيۋدجەتىنەن وتەيدى.
«كارتانى جاساپ شىعارۋ ءۇشىن اقشا ەمەس، اقپارات كوپ كەرەك. ارينە، ءاربىر تاريحي جەردىڭ اڭىز-اڭگىمەلەرىن جازا بەرسەك، وعان ۋاقىت تا، كارتانىڭ كولەمى دە جەتپەيدى. سوندىقتان ايشىقتى ءارى قىزىقتى دەگەن جەرلەردى ىرىكتەپ العانىمىز ءجون. ەندى، الداعى ءبىر-ەكى ايدىڭ ىشىندە ءبىز ول كارتانىڭ ەلەكتروندى نۇسقاسىن كورسەتە الامىز»، - دەپ اتاپ كورسەتتى مينيستر.
ايتا كەتەيىك، قازاقستانىڭ كيەلى جەرلەرىنىڭ كارتاسى مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى ماقالاسىندا ايتىلعان نەگىزگى يدەيالاردى جۇزەگە اسىرۋ اياسىندا قولعا الىنىپ وتىر.
«وسى تۇرعىدا، پرەزيدەنت ۇلىتاۋ تورىندەگى جادىگەرلەر كەشەنىن، قوجا احمەت ياساۋي ماۆزولەيىن، تارازدىڭ ەجەلگى ەسكەرتكىشتەرىن، بەكەت اتا كەسەنەسىن، التايداعى كونە قورىمدار مەن جەتىسۋدىڭ كيەلى مەكەندەرىن جانە باسقا دا جەرلەردى ءوزارا ساباقتاستىرۋدى تاپسىردى. اتالعان جەرلەردىڭ بارلىعى - ءبىزدىڭ ۇلتتىق بىرەگەيلىگىمىزدىڭ كەرەگەسى»، - دەيدى مينيستر مۇحامەدي ۇلى.
اۆتور: ارمان اسقاروۆ
