كەلەسى جىلى بارلىق وڭىردە ءدارى باعاسى بىردەي بولادى - مينيستر ءبىرتانوۆ
ق ر دەنساۋلىق ساقتاۋ ءمينيسترى ەلجان ءبىرتانوۆتىڭ ايتۋىنشا، بۇگىندە ارنايى زاڭ جوباسى دايارلانىپ جاتىر، دەپ حابارلايدى قازاقپارات ءتىلشىسى.
«قازىرگى كەزدە ءبىز تەك مەملەكەتتىڭ اقشاسىنا ساتىپ الىناتىن ءدارى- دارمەكتەردىڭ باعاسىن رەتتەي الامىز. بۇعان دەيىن جەكەمەنشىك ءدارىحانالاردىڭ باعا ساياساتىنا ارالاسۋعا قۇقىعىمىز بولعان جوق. ەندى، ارنايى زاڭ جوباسىن دايارلادىق. بۇگىندە اتالعان قۇجاتتىڭ تۇجىرىمداماسىن ازىرلەپ جاتىرمىز. الداعى ۋاقىتتا ونى قوعامدىق تالقىلاۋعا شىعارامىز. كۇزدە زاڭ جوباسىن پارلامەنتكە ەنگىزۋىمىز كەرەك»، - دەدى ءبىرتانوۆ بۇگىن استانادا وتكەن باسپا ءسوز ءماسليحاتىندا.
ءمينيستردىڭ سوزىنە قاراعاندا، زاڭ قابىلدانعاننان كەيىن شامامەن كەلەسى جىلى ءدارى- دارمەكتەردىڭ شەكتى باعاسى بەكىتىلەتىن بولادى. «سول كەزدە قازاقستاننىڭ بارلىق ايماقتارىندا دارىلەردىڭ باعاسى بىردەي بولادى»، - دەپ اتاپ كورسەتتى مينيستر.
اۆتور: ارمان اسقاروۆ
