وڭتۇستىك كورەيالىق ءانشى تاعى دا الەۋمەتتىك جەلىنى «شۋلاتىپ» جاتىر - كەسكىن

استانا. قازاقپارات - وڭتۇستىككورەيالىق ءانشى PSY YouTube-تاعى جەكە كانالىنا ەكى جاڭا بەينەبايانىن جاريالادى.

قوس روليك تە 1 ساعات ىشىندە ميلليوننان استام كورىلىم جيناعان. I LUV IT دەپ اتالاتىن بەينەباياندا ايگىلى جاپوندىق ءانشى پيكو تارو بار. ونىڭ Pen-Pineapple-Apple-Pen دەگەن ءانى Billboard چارتىندا (چارت - تانىمال انشىلەردىڭ نەمەسە مۋزىكالىق توپتاردىڭ ءتىزىمى، ولاردىڭ تانىمالدىلىعى ديسكتەرى مەن توپتامالارىنىڭ ساتىلىمى نەگىزىندە انىقتالىپ، جاريالانىپ تۇرادى) وسىعان دەيىن جارىق كورگەن بارلىق اندەردىڭ ىشىندەگى ەڭ قىسقاسى رەتىندە گيننەستىڭ رەكوردتار كىتابىنا ەنگەن.

ەكىنشى ۆيدەو - New Face انىنە تۇسىرىلگەن بەينەبايان. ايتا كەتەيىك، وڭتۇستىك كورەيالىق رەپەر PSY Gangnam Style انىمەن الەمگە تانىمال بولعان. بۇل انگە تۇسىرىلگەن كليپ YouTube-تا العاش رەت ەكى ميلليارد كورىلىم جيناعان روليك اتانعان ەدى.

 

اۆتور: ەربول جانات