ا ق ش ەلشىسى ءوزىنىڭ كيىز ءۇيىن كورسەتتى - فوتو

استانا. قازاقپارات - ا ق ش- تىڭ قازاقستانداعى توتەنشە جانە وكىلەتتى ەلشىسى دجوردج كرولدىڭ ايتۋىنشا، كيىز ۇيدە ول مارتەبەلى قوناقتاردى قارسى الىپ، قازاق حالقىنىڭ ۇلتتىق تاعامدارىن ۇسىنادى، دەپ حابارلايدى قازاقپارات ءتىلشىسى.

كيىز ءۇي ا ق ش ەلشىلىگىنىڭ اۋماعىندا ورنالاسقان. ىشىندە بارلىق جيھازدارى قويىلماسا دا، بەزەندىرىلۋ جاعى كوز توياتىنداي.

ورتادا ءبىر ۇستەل، جان-جاعىندا وتىراتىن جەرلەر، سونداي-اق مۋزىكا قوياتىن ارنايى اپپاراتۋرا بار.

كيىز ۇيگە قوسىمشا عيمارات ارقىلى وتۋگە بولادى. ول عيماراتتا رەسمي دەلەگاتسيالاردى قابىلدايدى.

ال شىنىمەن قاپتالعان دالىزبەن كيىز ۇيگە كىرۋگە مۇمكىندىك بار. «بۇل كيىز ءۇيدى قوستاناي جاقتا تۇراتىن ءبىر وتباسى جاساپ بەرگەن. ەر ازاماتتار قاڭقاسىن قۇراستىرسا، ايەلدەر بەزەندىرۋ جاعىن اتقاردى. جاڭىلماسام، 10-12 قاناتتى كيىز ءۇي بۇل. ءيا، حاندار وتىراتىن كيىز ءۇي. مەن ءوزىم بۇعان دەيىن وزبەكستان مەملەكەتىندە ەلشى بولدىم. سول جاقتا جۇرگەندە قازاقتىڭ ەلشىسىنە جولىعىپ، وسى جاققا اۋىسقاندا جەرگىلىكتى حالىققا ءوز قۇرمەتىمدى قالايشا كورسەتسەم بولاتىنىن سۇرادىم. سوندا ونىڭ ايتقانى، ەلشىلىكتىڭ جەرى ۇلكەن بولسا، كيىز ءۇي تىگىڭىز. ءسويتىپ، مەن ارنايى تاپسىرىس بەرىپ، وسى كيىز ءۇيدى جاساتتىم. مەن ءوزىم بۇل جەردە قازاقتىڭ جانىن سەزەتىن سياقتىمىن. جانعا جايلى باسپانا، ەركىندىك پەن كەڭ دالانىڭ سارىنى سەزىلەدى. وزبەكستاندا باسقاشا بولدى»، - دەدى كرول جۋرناليستەرگە بەرگەن سۇحباتىندا.

ەلشىنىڭ ايتۋىنشا، كيىز ۇيدە ول رەسمي قوناقتاردى قابىلدايدى. اسىرەسە، قازاقستاننىڭ مينيسترلەرى ونى كورۋگە اسىعادى ەكەن.

ايتا كەتەيىك، وسىدان ەكى جىل بۇرىن ا ق ش ەلشىلىگىندەگى كيىز ءۇيدىڭ اشىلعانى جايىندا حابارلانعان بولاتىن.

اۆتور: ارمان اسقاروۆ