بەكبولات تىلەۋحان قارجى پيراميداسىنىڭ قىزمەتىن باقىلاۋعا الۋدى سۇرادى
«قازاقستاننىڭ باس پروكۋرورى جاقىپ اسانوۆقا باعىتتالعان مەنىڭ دەپۋتاتتىق ساۋالىما مىناداي جاعداي سەبەپ بولىپ وتىر. جالپى، ساۋات دەگەن، ءبىلىم دەگەن نارسە بار. ءبىز الەم حالىقتارىنىڭ ساۋاتتىلىق رەيتينگىسىندە 11-ورىندا تۇرعان ەل ەكەنبىز. شۇكىر، ءبىزدىڭ 99,6 پايىز حالقىمىز ءارىپ تانيدى. ال ءبىلىمدى دەپ ايتا الامىز با؟! مىسالى، قارجىلىق ءبىلىم تۇرعىسىنان. جوق، ايتا المايمىز. سەبەبى جىل سايىن شىعاتىن قارجىلىق پيراميدالارعا بار تاپقانىن سالىپ، ودان وپىق جەپ، اقشاسى كۇيىپ، ينسۋلت الىپ، نەسيەسىن جابا الماي، اعايىنمەن كەيىسىپ جاتقاندار وتە كوپ-اق. مىنا سايلاۋشىلارىمىزدىڭ تاراپىنان قويىلىپ جاتقان تالاپ وسىنى جەتكىزۋدى اماناتتاپ، تاپسىردى، بۇنى ايتپاسىمىزعا بولمادى. بيىل Questra World دەيتىن قارجىلىق كومپانيانىڭ داقپىرتى ءجۇرىپ تۇر. اڭقاۋ قوعام ولاردىڭ سەن ينۆەستورسىڭ دەگەنىنە سەنىپ، جيعان بار اقشاسىن سوعان سالىپ جاتىر. كولىك الۋعا، ءۇي الۋعا، بيزنەس اشۋعا دەپ جيناعان قورداعى بارلىق اقشاسىن وسى كومپانيانىڭ شوتىنا سالادى دا، ودان از ۋاقىتقا پايدا كورەم دەپ الدانىپ وتىر جانە الدانعالى جاتىر»، - دەدى دەپۋتات.
ونىڭ سوزىنشە، وسى Questra تاقىلەتتەس قازاقستانداعى كومپانيانىڭ ورتا دەڭگەيلى مەنەدجەرىنىڭ استىنا كەلىپ قوسىلعانداردىڭ ءوزى 12 ميلليون دوللار جيناپ بەرىپتى. «تولىق اقشانىڭ كولەمىن بىلە المايمىز، قيسابى جوق وندا. ەندى وسى Questra سياقتى كومپانيالار وزدەرىن يسپانيادا ورنالاسقانىن ايتقانمەن، نەگىزگى مەكەن-ءجايى ۆيرگين ارالدارى سەكىلدى وففشورلاردا ورنالاسقان. ايتايىن دەگەنىم: حالىقتىڭ اقشاسى شەتەل اسىپ، ءىزىم- عايىم جوعالىپ جاتىر. وعان كىم جاۋاپ بەرەدى. ونسىز دا داعدارىس بولىپ جاتقاندا ازاماتتاردىڭ ءوز قولىمەن اقشاسىن بەرىپ جاتىر. بۇل كومپانيالاردىڭ ءبارى زاڭسىز. قازاقستاندا ءبىر تيىن سالىق تولەمەيدى. شەتەلدىكتەر بىزگە اقشانى بەرمەيدى، تەك اقشانى بىزدەن الىپ كەتىپ جاتىر»، - دەپ قىنجىلدى ب. تىلەۋحان.
دەپۋتات، كۇماندى شەتەلدىك قارجىلىق كومپانيالاردىڭ قىزمەتىن تەزىرەك باقىلاۋعا الىپ، ونى توقتاتۋ جاعىن ۇسىندى. «ولار پايدانى تاباسىزدار تەك اقشاڭدى اكەلسەڭ بولدى دەدى دە، ميللياردتاعان تەڭگەنى حالىقتان جيناپ الدى جانە جابىلىپ قالدى. سولاردىڭ سوڭىنان تەرگەۋ جۇرگىزگەن بىرەۋ بار ما؟ بار بولسا، نەگە ونى اشكەرەسىن شىعارمايمىز. ءدال وسى ساتتە Questra-عا اقشا سالۋ ءۇشىن كرەديت الىپ، لومباردقا التىنىن وتكىزىپ، كولىگىن ساتىپ جاتقان ادامدار كوپ. انە-مىنە دەگەنشە Questra - مىز دا جابىلىپ قالادى، تۇسىنىكتى، ۇرلەنگەن شار سەكىلدى ول جارىلادى. اقىرىندا ينسۋلت العان، ينفاركت العان اعايىن قالادى. سوسىن كىم جامان؟! ۇكىمەت جامان بولادى. سەبەبى بۇنداي قارجىلىق كومپانيالاردى تەكسەرۋ كەرەك ەدى، توقتاتۋ كەرەك ەدى، حالىقتى قارجىلىق ساۋاتتاندىرۋ كەرەك ەدى، دەيدى» - دەدى دەپۋتات.
اۆتور: جاسۇلان جولدىبايەۆ
