زامانبەك نۇرقادىلوۆتىڭ قىزى اكەسىنىڭ باسىنان وتكەن ءبىر وقيعانى ايتىپ بەردى

استانا. قازاقپارات - قۇرالاي نۇرقادىلوۆا اكەسى تۋرالى ەستەلىگىن ءبولىسىپ، جەلىدەگىلەردىڭ ىستىق ىقىلاسىنا بولەندى.

ول مارقۇمنىڭ شىققان شىڭىنا قاراماستان، قاراپايىم ازامات بولعانىن ايتىپ جاتىر.

بۇل تۋرالى Stan.kz حابارلايدى.

«ماعان اكەم كوپ وسيەت قالدىردى... ءبىراق، باستى ونەگەنى ونىڭ ادامدارعا دەگەن قارىم- قاتىناسىنان العان بولاتىنمىن! پەيىلى كەڭ ەدى. جاي قولىن سوزىپ امانداسقان ادامنىڭ ەسىمىن جاتتاپ الاتىن. «ازيا داۋسىندا» كورگەن ءبىر جاعداي تۋرالى ايتىپ بەرەيىن. كورەرمەن كوپ بولدى. ولاردىڭ اراسىنان شەتەلدىك ءادىل قازىلار مەن اكەم ءجۇرىپ ءوتىپ كەلەدى. ءبىر بالا «زامانبەك اعا، ماعان قول بەرىڭىزشى!» دەپ ايقايلادى. اكەم ارتقا قايتىپ «سەنىڭ اتىڭ كىم، بالام؟» دەپ سۇرادى.

ول «قوبىلاندى» دەدى. اكەم «جارايسىڭ، قوبىلاندى» دەپ كۇلىمسىرەپ، قولىن قاتتى-قاتتى قىستى. كەلەسى كۇنى دە اكەم ءوز ورنىنا بارۋ ءۇشىن الاڭنىڭ ورتاسىمەن ءجۇرىپ ءوتتى. الگى بالا تاعى دا «زامانبەك اعا، قالىڭىز قالاي؟» دەپ داۋىستادى. اكەم ونى كوپتىڭ اراسىنان تاۋىپ الىپ، «ءبارى جاقسى، قوبىلاندى! كوپ جاسا، بالام!» دەپ جاۋاپ بەردى. اكەم ءوزىنىڭ شىققان شىڭىنا قاراماستان، ادامدارعا كەلگەندە تىم قاراپايىم بولاتىن»، - دەيدى قۇرالاي نۇرقادىلوۆا.

جەلى قولدانۋشىلارى دا سانگەردىڭ ءسوزىن قوشتاي ءتۇستى. مارقۇم تۋرالى جاقسى ەستەلىكتەرىن ءبولىستى. «سۇلۋىم، جارايسىڭ! مەن ءاردايىم ءوزىڭدى ماقتان تۇتامىن»، «ول ءوزىنىڭ حالقىن قاتتى ءسۇيدى! ۇلتجاندى ەدى»، «ءسىزدىڭ اكەڭىز ۇلى ادام بولاتىن. ول ءاردايىم حالىقتىڭ ەسىندە قالادى»، «ءيا، ول، راسىمەن، وتە جاقسى ادام بولدى» دەپ جازادى ولار.