09:46, 10 - مامىر 2017 | GMT +5
ات جارىسىنا قاتىسقان اۋدان اكىمى اتتان قۇلاپ، جاراقاتتانىپ قالدى
استانا. قازاقپارات - پاۆلودار وبلىسىندا 1-مامىردا ات جارىسىنا قاتىسقان اۋدان اكىمى اتتان قۇلاپ، جاراقاتتانىپ قالدى. باياناۋىل اۋدانىنىڭ اكىمى ورازكەلدى قايىرگەلدينوۆ ەرتىس وڭىرىندەگى شەنەۋنىكتەر ىشىندە اتتىڭ قىر- سىرىن جاقسى بىلەتىن، دەپ جازادى «ۆرەميا» باسىلىمى.
«جۇگەن-نوقتاسى دۇرىس كيگىزىلمەگەن، سوندىقتان ول كىسىنىڭ اياعى ۇزەڭگىدەن شىعىپ كەتىپ، بار سالماعىمەن ارتقا كەتكەن» دەپ ءتۇسىندىردى بولعان وقىس وقيعانى وبلىس اكىمىنىڭ باسپا ءسوز حاتشىسى ازامات بايتەنوۆ.
جەدەل جاردەم كولىگىمەن جەتكىزىلگەن سوڭ اكىمگە باس- ميدىڭ شايقالۋى، مويىننىڭ اۋىرۋى سىندى دياگنوز قويىلعان. 60 جاستاعى اكىم قايىرگەلدينوۆ ەرتەڭىندە جينالىس جاساپ، ءوز جۇمىسىن جالعاستىرىپ كەتتى.
